حاجات كده

أهداف الثورة

-----------

المبدأ الأول: القضاء على الاحتلال البريطاني وأعوانه من المصريين الخائنين عن طريق التصدي للقوات البريطانية المرابطة في منطقة قناة السويس.

المبدأ الثاني: القضاء على الإقطاع.

المبدأ الثالث: القضاء على الرأسمالية والاحتكار الشخصي.

المبدأ الرابع: بناء نظام يحقق عداله اجتماعية بين طبقات الشعب.

المبدأ الخامس: بناء جيش قومي قوي يستطيع التصدي للمؤامرات الأجنبية التي تهدف إلى إعاقة القوة العسكرية المصرية، كما يعمل هذا الجيش كدرع في مواجهة معارضي الثورة داخل الدولة.

المبدأ السادس: بناء نظام ديمقراطي سليم لمواجهة التشويه السياسي الذي حاول أن يمحو معالم الوحدة الوطنية.

قالوا لنا كده فى التاريخ

وعشان نحفظهم قالوا 3 قضاء و3بناء

ايه اللى اتنفذ من الاهداف دى غير القضاء على الاحتلال ؟

فين ال 3 بناء؟

سؤال يطرح نفسه :)

بلا هم

------------------------------------------------------

ظاهره

------

ظاهره غريبه لاحظتها الاسبوعين اللى فاتوا :)

سواقين التاكسى بقوا بيسمعوا اغانى بيئه بيئه بيئه :)

وفى اغنيه مشهوره اوى ببقى هموت من الضحك وماسكه نفسى بالعافيه وانا فى التاكسى

المطرب بيطرب وبيقول مش عارفه ايه فيما معناه يعنى : بصيت لنفسى فجاه .. لقيتنى كبرت فجأه (بردو) ..تعبت من المفاجأه

مفجأه فجائيه يعنى.. لا وخدوا بالكم من السجع فى فجأة ومفاجأه

الاغنيه دى مشهوره فى التاكسيات ولما ركبت ميكروباص سمعتها ده غير الموتوسيكلات الصغننه اللى طالعه الايام دى عندنا وراكبين عليها عيال كده بتاع 13 او 14 سنه ومشغلين اغانى و الصوت عااااااااااالى اوى

المشكله انى ظبطت نفسى بغنى الاغنيه دى :))

----------------------------------------------------------

يوم الاضراب

------------

فاكرينه؟.. الاضراب الاولانى مش بتاع 4مايو ده.. المنصوره مكنش فيها اضراب بالمعنى يعنى

يومها روحت الكليه لان النتيجه كانت هتظهر اولا

وثانيا لان كان فى محاضرة باطنه ودكتور الباطنه بياخد الغياب وملوش فى الاضرابات يعنى :)

اذا كان يوم اضراب اساتذة الجامعه لقيناه جاى من 8الا10 وقاعد فى المدرج :)

وقالنا بصريح العباره كده (انا خوفت ياولاد) الوزير مشدد لازم نحضر

المهم يعنى كان فى مواصلات عادى جدا.. الميكروباصات كانت قليله شويه لكن التاكسيات تقريبا كانت معقوله

وليا زمايل كانوا جايين من الزقازيق ودمياط والمطريه وعادى كان فى مواصلات على حسب ماقالوا

فى محلات كانت فاتحه

وفى محلات كانت فاتحه نص فتحه كده عشان لو حصل حاجه تقفل بسرعه يعنى

ومعظم الموظفين بتوع الكليه كانوا موجودين

الوحيد اللى غاب وحسينا بغيابه وكنا هنقتله كلنا

موظف فى الضمان والجوده :)

كانت النتيجه محجوبه على النت.. عشان كانوا طالبين مننا استبيان عن الدكاتره ومكناش عملناه

وبعدين قولنالهم خلاص نعمله بس فين الموظف عشان كل طالب له باسورد ورقم يدخل بيه ؟

قالوا لنا غايب :)

حبكت يعنى يعمل اضراب وهو الوحيد اللى يعمل

وعلى فكره معظم اللى قعد فى بيته كان خايف يخرج .. مش مضرب بمزاجه يعنى

هما بيقولوا الاضراب نجح

بس انا مش شايفه حاجه حصلت

كل حاجه زى ماهيا

------------------------------------------

السيد الوزير المحافظ

--------------

بصراحه احسن حاجه حصلت ان المحافظ اللظيظ بتاعنا اتشال

كان فاضحنا فى كل حته .. ال مش عارفه الاطفال فى ارحام امهاتها بتبايعك ياريس وشعب الدقهليه يبايعك ياريس

ولا حد بايع ولا حد كلمه اصلا ولا داسله على طرف

المحافظ الجديد لسه بشايره مطلعتش اوى غير شوية حركات قرعه كده معرفش هو المسؤل عنها ولالا

يافطه فى كل حته وبين كل يافطه واختها يافطه تانيه وكلها جمل مكلبظه كده

نعم للحوار... ولا لهز الاستقرار

وحاجات من هذا القبيل

وكل ده اتحط قبل اضراب 4مايو اللى كان هيتعمل يعنى وفشل طبعا

واتشال تانى بعد شويه

وهيصه بقى وكله بيبارك ويهنى

ومش عارفه المهندز المحاسب الاستاذ يهنىء السيد الوزير المحافظ على ثقة سيادة الرئيس فيه

وتلاقى المهندز اللى بيهنى ده كان اصلا متصور مع المحافظ القديم وكانوا زى السمن ع العسل يعنى

مات الملك عاش الملك

انا بتغاظ اوى من الشعارات دى