والله كنت هروح فيها

مش عارفه بهون عليك ليه بجد
مش متعصبه انا ولاهشد فى شعرى ولا هيجيلى شلل ولا انهيار عصبى ولااى حاجه
انا هاديه اهو
بس فيها ايه لما كنت ترنلى لما ترجع من السفر؟؟
فيها لما ترن وبعدين تنام يعنى
عارفه هيكون فى اعذار وانك اكيد مش قاصد
!صح

الشبكه واقعه
الموبايل فصل شحن ومخدتش بالك
اتصلت فعلا بيا بس الشبكه عندى بتخرف

ماشى الاعذار دى انا عارفاها ومصدقاها لانها ظروف وبتحصل معايا انا كمان
طب مدخلتش نت ليه سبتلى ايميل وكنت هشوفه اكيد لما ارجع من الكليه ؟؟؟؟

ممكن يكون النت فاصل عندك
او الكهربا فاصله


عارف بخلقلك اعذار ليه؟؟
عشان مش عاوزه اصدق انى مش على بالك وانك مش مهتم بقلقى
عشان لو صدقت هعيش ليه ؟؟
ماانا عايشه عشانك انت
لو انت مبتهتمش بقلقى وباعصابى يبقى مبتحبنيش
مش محتاجه عبقريه يعنى
وانا مش هستحمل اعيش من غيرك

لو تعرف القلق بيعمل فيا ايه لما مبتعبرنيش هصعب عليك

لما بتخيل ان الموبايل ممكن يكون مقفول عشان العربيه عملت حادثه لاقدر الله والموبايل اتكسر مثلا
او حرامى لاقدر الله سرقك وعملك حاجه عورك بعد الشر
لما بتخيل انك لوحدك فى مكان غريب عنك وناس متعرفهومش

لو تعرف بحبك ازاى
لو تعرف انى بحسك ابنى
بيبى صغير مش هحس انه كويس وفى امان غير فى حضنى

ايوه ابنى وبخاف عليك من الهوا والناس الوحشه والبرد والضلمه والحراميه
لدرجة بخاف فلوسك تقع او تتسرق مثلا ومتعرفش تروح
او تتخانق مع حد ويعورك
او تركب باص غلط وتروح حته تانيه غير اللى هتروحها

اهون عليك اسمع (الهاتف الذى طلبته ربما يكون مغلقا) وانت عارف انى بموت لما بسمعها


المفروض انى ابعتلك الكلام ده فى ميل مثلا لانك متعرفش البلوج ده اصلا
بس مقدرش
مينفعش
هنكد عليك وهقلبها نكد
وانت هتزعل وتقولى انك مش عيل صغير
وهقعد اسبوع مثلا اصالح فيك
او ممكن تحس بالذنب ومتهونش عليا

مش عارفه المشكله فيا ولاايه
جايز حبى ليك وصل لمرحلة المرض
خايفه اخنقك وعشان كده بردو مش هبعتلك الكلام ده على الايميل
وادينى فضفضت وخلاص
وهتصرف كأن محصلش حاجه
والحمدلله انك بخير ياحبيبى