ملل

المشهد الاول

بليل فى الانتريه وخالتى قاعده

خالتى:نوووسه انتى خاسه كده ليه يابنتى مينفعش كده
انا : ياخالتو هعمل ماانا طول عمرى كده
خالتو : لا اتخنى شويه مينفعش
انا : حاضر ربنا يسهل


المشهد التانى

ليل بردو وحنة واحده صاحبتى وتجمع كبير من الصديقات
س:
نوووسه ازيييييييييييك عامله ايه وحشانى اوى والله انتى مالك يبنتى خسيتى كده ليه
ص:يابنتى هتختفى كده اتخنى شويه
ع: انتى حد بياكل اكلك هاهاهاهاهاهاهاهاها
خ: خدى من عندى 10 كيلو نيهاهاهاهاها


المشهد التالت

ادام المدرج وتجمع من زميلات الدراسه فى انتظار فتح الباب

ن: انتى مش ناويه تتخنى بقى ؟بصى تسمعى نصيحتى ؟
(نوسه: قولى يا(ن
ن: اعملى زى مابعمل بالظبط كل ماتلاقينى باكل حاجه كلى زيى وهتشوفى النتيجه
نوسه : هيجيب نتيجه بجد ؟؟؟؟
م: متسمعيش كلام ن هتبقى اد الفيل
نوسه: ياارريت عشان اخلص من الحوار ده بقى


المشهد الرابع

مش عارفه ليل ولانهار (مشيها الصبح بليل):ي

واحده صحبتى بتزورنى
بفتح الباب وبالاحضاان يابلادنا ياحلوه
د: وحشاااانى ياندله بقالنا اد ايه مشوفناش بعض ولا بتتصلى حتى .. ايه ده يابت حاسه انى بحضن ورقه يخربيتك خايفه اكسرك اتخنىىىى بقى هتتجوزى ازاى كده
نوسه : يعنى انتى مقطعه التليفونات وبعدين انا ورايا كليه لكن انتى خلصتى وبحسسسسسدك وبعدين عجباه كده ياستى ومش هتخن
د: بيجاملللللك
نوسه: اطلعى منها بس


المشهد الخامس

احد قاعات الافراح وفرح واحده من صحباتى الانتيخ

د: ر(العروسه يعنى) قمررررررررررر ماشاء الله عقبالكم يابنات
نوسه : يارب قريب ان شاء الله يابنات كلنا
ح: هنبقى قمرات كده ياعيال ولاايه
نوسه: ان شاء الله .. كل العرايس بيبقوا حلوين وبعدين احنا حلوين من غير حاجه اصلا
د: نوسه هتبقى قمررر بجد بس تتخن شويه
ح: اه فعلا يانوسه اتخنى شويه عشان تملى الفستان ياماما.. فستان الفرح بالذات بيحب حاجه تملاه كده
د: المفروض


المشهد السادس

شويه ستات مليش علاقه بيهم واقفين مع اختى

أ: اختك دى يا(..)اموره بس لو تتخن شويه
ب: اه وشها هادى كده ولما تملى هتبقى قمر اكتر من كده كمان بس تتخن حبه بقى
ت: بكره تتخن ماهو كل البنات بتضرب فى سن معين وبعد الجواز بيبقوا حجم عائلى
هاهاهاهاهاهاهاهاهاهاهاهاهاهاها


المشهد السابع

عياط وكآبه وعاملين محزنه نهار بردو

ه: انا زهقت يانوسه
نوسه: ومين سمعك يا(ه ).. انا حاسه لو حد كلمنى فى الموضوع ده تانى ادامى حلين يااما هسيبه وامشى يااما هضربه بوكس فى مناخيره
ه: انا كل ماحد يشوفنى يقولى انتى رفيعه انتى لازم تتخنى هما بياكلوا اكلك
مش مستحمله خلاااااااااااااص
نوسه: نفس الحوار يااختى والله بحس ان كل المواضيع خلصت من الدنيا وكل المشاكل اتحلت ومفيش غير موضوع رفعى اللى يتكلموا فيه
ه: وبعدين هنعمل ايه
نوسه : المفروض نتخن عشان بردو هما عندهم حق
ه: يعنى هو بايدنا يابنتى؟؟مااحنا بناكل عادى وطبيعيين يعنى
نوسه: عارفه بس اكيد فى خلل ما مش معقول كلهم شايفين حاجه واحده واحنا اللى صحاه بس لو يغيروا الموضوع ويفكهم مننا شويه هنتخن براحتنا من غير ضغط ومن غير ملل
ه: يااااااااااريت

واحده صاحبتنا نطت فوق دماغنا
ل: مش هناكل بقى ولاايه
اظن انتوا المفروض تباتوا فى الكافتيريا عشان تتخنوا شويه

انا و(ه)فى صوت واحد : حررررررررررررررررام
ل: خلاص خلاص ان شالله ماكلتوا