اللى حضر المحاضرات هيعرف يحل

خلصت الامتحانات على خير بالرغم من ان ختامها كان وحشششش اوى بس لعله خير باذن الله

ليه كان وحش؟ ده سؤال بردو ؟

انتوا متعرفوش ان اخر ماده كانت بروسيزس وما ادراكم مالبروسيزس

ربنا مايوريكم ابداااااا

وكعادة الدكاتره فى كل امتحان اول مايدخلوا يقروا الاسئله .. ويشوفوا اذا كان فى مشاكل او غلطات فى الاسئله

وكانت دايما جملتهم المفضله .. (اللى كان بيحضر المحاضرات هو اللى هيعرف يجاوب) ..ويضحك ضحكه شريره ويخرج

ولانى بسمع كلام الدكاتره من قديم الازل

وبما انى خبره فى هذا المجال (ماانا عايده السنه بقى ) احب اقولكم ان الكلام ده كلام فااااااااااارغ

عندكم انا مثلا -بلافخر يعنى- محاضرات البروسيزس بالذاااات مكنتش بغيب فيها ولو بموت حتى

والنتيجه ؟؟؟ اول مابصيت فى ورقة الاسئله حصلتلى متلازمه معروفه جدا .. تنحت ثم فتحت بقى ثم قريت الورقه 3مرات ثم بصيت حواليا

ولمدة نص ساعه من مدة الامتحان اللى هيا ساعتين .. مكنتش عارفه الاسئله عاوزه ايه

وبعدين سمعت اصوات احتجاجات كده فى اللجنه و.. عاوزين دكتور صلاح .. عاوزين دكتور حسن .. (الدكاتره اللى حاطين الامتحان يعنى) و.. اللى يسأل زميله هو السؤال الاول عاوز ايه؟

هو ده تبع محاضرة ال overdenture ولاattachment

واشياء من هذا القبيل يااخوانى

حتى جاء الفرج .. ودخل الدكتور حسن اسم الله عليه ..وقال الجمله المشهوره .. اللى هيا ايه ياحلوين؟

ايووووون .. اللى حضر المحاضرات هيعرف يحل

وبعد مزيد من الضغط قرا ورقة الاسئله وقالنا اعملوا كذا

وعملنا زى ما قال دكتور حسحس

وبعد ماحلينا اللى ربنا قدرنا عليه والعيال معرفتش تغش عشان المراقبه زعقتلهم وقالتلهم الغش حررررررام

انا عامة مكنتش ناويه اغش حتى لو محليتش خالص

اصلا من اللى سمعته من العيال اللى ورايا لقيتنى بقول لنفسى ايه العك اللى بيقولوه ده ؟

طب ما العك بتاعى احسن بقى من عك الغريب

وحدثت المفاجاه الكبرى بدخول دكتور صلاااح لما اتنحنح وقال

لا طبعا السؤال بتاعى ملوش علاقه بكذا (وكذا دى كان قالها لنا دكتور حسحس لما فسرلنا الاسئله) ..ده بيتكلم عن محاضره تانيه يادكاتره وطبعااااا... اللى حضر المحاضرات هو اللى هيعرف يجاوووب

الله عليك

كنت عاوزه اقوم اتشعلق فى رقبته واقوله وربنا كنت بحضر المحاضرات يابييييييه

يابيه كنت بحضرررررر والاسئله دى مترضيش ربنا

بس خرج بقى وفلت من ايدى

هما هيحصلهم كساح مثلا لو جابوا الاسئه نقدر نفهمها ؟

مبقولش يجيبوا اسئله سهله والله

انا قصدى صيغة السؤال نفسها تبقى مفهومه

ماهو مش معقول منفهمش السؤال حتى عاوز ايه .. طب هنحله ازاى ؟

المشكله ان بردو اجابات الاسئله لما عرفناها بعد ماخرجنا من اللجنه مكانتش اتقالت فى المحاضرات ولاحاجه

وفى سؤال كامل هيتوزع درجته على الامتحان عشان الدفعه كلها مش جاوبته

طب كان ليه م الاول يعملوا كده؟

ياااااااااارب ارحمنى من الكليه دى بقى

واللى يغيظنى اكتتتتتتتتتتتتر ان كل اللى يشوفنى يقولى اسنان سهله اسنان سهله

تعالوا شوفوا اسنان السهللللللله

ربنا يخرجنا منها بصحتنا بس

يلا المهم خلصنا امتحانات وانتوا وحشتوونى والرغى ع المدونه وحشنى اووى