وكحيت .. والمنديل لقيت فيه دم
دم يالهووووووى
وصحيت م النوم
يخرب بيت الاحلام دى
قعدت ع السرير وحطيت ايدى على خدى وتقمصتنى صخصية فاتن حمامه فى الفيلم بتاع عبد الحليم واحمد رمزى وعمر الشريف ده ..يووه مش فاكره اسمه ,, وحسيت انى شاديه فى فيلم دليله -دليله ده صح ولاايه؟- المهم يعنى اى بطله اصيبت بالدرن وخلاص
وعلى غرار كل البطلات الرومانسيات الشفافات دول تخيلت انى بكح كحه رقيقه وراسى على كتف محمد وماسكه المنديل وبتنفس بسرعه وبصوت عالى وبقوله
كان نفسى اعيش معاك طول العمر
اوعى تتجوز بنت خالتك يامحمد بعدى
لو ضرورى هتتجوز يعنى.. ابقى اتجوز اى واحده تانيه غيرها عشان متغاظش وانا ميته بس
وابقى سمى بنتك على اسمى بقى
واحتفظ بالهدايا بتاعتى ومتخليش مراتك الجديده تلمسهم ولاتشوفهم حتى احسن شبحى يطلع ياكلها انا حذرتك اهو
ولقيت نفسى متأثره اوى واتنكدت اوى واتخيلته خلاص اتجوز واحده تانيه وقعدت اعيط بقى
وبعدين قولت يابت مبدهاش بقى اما اتصل بيه او ادخل نت انكد عليه شويه
وقد حصل
قولتله محمد لو انا موت هتتجوز بعد موتى بكام سنه؟ :(
مش فاكره قالى ايه بس حسيت ساعتها انه هيدخل من شاشة الكمبيوتر يعضنى ويرجع تانى
وروحى يادقايق وتعالى ياساعات لقيت نفسى بكح بجد
يالهوى هو انا عيانه بجد ولاايه
وتقمصتنى الصخصية تانى ولذة الاستشهاد ودخلت المطبخ لقيته زباله بصراحه قولت اغسل المواعين عشان اموت بضمير مرتاح ولما يفتكرونى يقولوا دى ماتت وهيا غاسله المواعين
حطيت شوية اغانى نكد
وفتحت الحنفيه وقعدت اغسل بقى ووصلت للبوتاجاز وكنت خلاص بعيط من كتر قذارته اصلا واتنرفزت بقى مين اللى بيدلق عليه شاى وطبيخ انا مش عارفه
المهم قولت مبدهاش يابت يانوسه لازم اطمن على صحتى بقى واروح للدكتور مدام موقعة المطبخ عدت على خير
وروحت والراجل عملى اشعه زودلى الرعب اصلا
انا بحسب شوية انفلونزا يعنى
يعمل اشعه لييييه؟
لقيته بيقولى استنى شويه بره لحد مااشوف الاشعه
نده عليا تانى ودخلت قولتله انا عندى درن ولاايه؟
قالى مفيش اى حاجه متقلقيش ده التهاب رئوى
وكتبلى حقن ومضاد حيوى ودوا كحه
وضاعت صخصية فاتن حمامه مع اول حقنة عضل اخدها
اصل فين الرومانسيه فى حقنة العضل ودوا الكحه
انا افتكر ان فاتن حمامه فى الفيلم كانوا بيعملوا لها شوربه تقريبا وخلاص
12 comments:
شفاكِ الله وعفاكِ
أنا بس هعتب عليكِ فى الحتة دى
حطيت شوية اغانى نكد
كنتِ ممكن تستبدليهم بشريط قرآن كان هيهديكِ ويدخلك الطمأنينة
أختك أمـ الله ـة
ايه الرعب ده
انا مره جالى نفس ذات الرعب ده من سرطان الصدر لما قعدت مده كبيره أكح و بتاع و قولت هبطل سجاير و بتاع
و كشفت فى الأخر لقيت عندى الربو أياه ألى مولود بيه و مفيش فى صدرى غيره الحمد لله
نياهاهاهاه
بلاش وساويس يا شاديه
هههههههههه
ألف سلامة عليكي ياقمر بجد قلقتيني عليكي ان شالله اللي يكرهك
الف سلامه عليكى
ويا رب تبقى دايما بخير
اول زياره لمدونتك ولن تكون الاخيره باذن الله
تقبلى تحياتى
لا حول ولا قوة الا بالله انا قولت بصى يا حبيبى انا بس بجهز العياده وهفتتحها قريب بيكى انتى اولا سلامتك يا سكر انتارفيش انتى من الامراض كلها وبعيدن هو انتى لسه اتجوزتى الواد علشان بعد الشر عنك تسأليه لما تموتى هيتجوز عليكى حرااااااااااااام ارحميه بقى
الف سلامة عليكى يا دوك بعد الشر يا ستى عليكى من الأقلام الهندى دى
بس ايه الضمير ده ؟؟ بتغسلى المواعين وانتى عندك التهاب رئوى ؟؟
الحمد لله يا ستى ان الفيلم الهندى ده خلص على خير :))
الف سلامة عليكى يا نوسة
بس افتكرى محمد قالك ايه لما سالتيه بعد الشر بعد الشر يعنى هيتجوز بعد كام شهر
ومش تثقى فيهم اوى كدا يا اوختشى
ده بتبقى مراته جنبه وبيبص على الموزة اللى جاية من الاتجاه التانى
اسمعى كلامى انا جاية اهدى النفوس
هههههههههههههههههه
فكرتينى بسارة فى المسلسل لما كانت بتقول انا بتعالج بالجيلى
الف سلامة عليكى وبعد الشر
سامحينى بقالى حبة بعيدة عنك
غصبن عنى والله
الف الف سلامه
اوعى تموتى قبل متتجوزى الواد
الواد يتعقد ويبقى فال وحش
موتى بعدها باسبوع
ههههههههههههههه
معاكى ان حقن العضل دى مش رومانسيه خالص
بس دوا الكحه ده قمه الرومانسيه
دا بيخلى الدماغ تهيس وتقول اجمد كلام حب
سلامو عليكو
شوربة و لحاف و سهوكة
دي روشتة فاتن حمامة
لسه قدامك ليلي مراد
دوا و غنا و أنور وجدي
:)
سلام
السلام عليكم
الف الف سلامه عليكي يادكتور
ان شاالله البطه السوده الوحشه وانتي لالا
ايه الافلام دي كلها بعد ده انتي علي كده نوسه شو علي رئي خالتي نوسه في فيلم يانا ياخالتي :))
خلي بالك منك يانوسه عشان خاطر محمد وعشانا احنا كمان :)
سلام
امة الله
ماهو النكد حكم بقى وبينى و بينك انا كنت عاوزه انكد على نفسى زياده مش عاوزه اطمن
ربنا يهدينا جميعا
نورتينى ياجميل
---------------------------------
شريف طلال
بابا بردو عنده ربو ومبيبطلش سجاير بردو معرفش هتبطلوها امتىىىى بس
واصلا من اول مادخلت الكليه المنيله بنيله دى وانا كل مااخد محاضره فيها شوية امراض ظراف كده افضل ابص لنفسى فى المرايه واروح اعمل تحاليل وحاجه تقرف يعنى
بقيت نوسه هيستيريا:)
نورتنى ياشريف
----------------------------------
المفقوعه مرارتها
الله يسلمك يارب من كل شر
متقلقيش انا فله اهو الحمدلله
نورتينى ياقمرايه
----------------------------------
صالح سعيد
الله يسلمك يارب من كل شر
نورتنى وتشرفنى بزيارتك ياافندم
----------------------------------
آآبى
هههههههههههههههههههههههههه
طب اعمل ايه بس فى نفسى
النكد بيحكم :(
نورتينى ياآآبى
----------------------------------
فوكس
طبعا ضميررررررر
عامة كل مايجيلى اكتئاب او اتعب الاقى نفسى نشيطه اوى فى شغل البيت
واول مااختى تيجى تزورنا وتلاقى السلم ممسوح مثلا تقولى خير يانوسه انتى عندك اكتئاب ؟متخانقه مع خطيبك؟
:) بقيت معروفه باكتئاب النضافه
نورتنى يافوكس
---------------------------------
قطة الصحراء
ههههههههههههههههههههههههههههههه
من غير ماتقولى انا هديت النفوس انا كمان
بس هو مسك نفسه عشان عارف انى عيانه وليس على المريض حرج بس :))
نورتينى ياقطقوطه
----------------------------------
مروه الزارع
رورووو
انتى فينك يابنتى
يلا افرحى بقى هجيب الموبايل بكره ان شاء الله اخيررااا
نورتينى يارورووو
----------------------------------
بطوط حبوب
ههههههههههههههههههههههههه
اموت بعد الفرح باسبوع؟
كده يعنى؟؟
طب قول اموت بعد الفرح ب54 سنه مثلا :(
اخص عليك :(
عامة احنا متفقين نروح الجنه ان شاء الله ونتجوز فى الجنه كمان وقالى مش هيبص لحور عين وكده
هيتجوزنى انا وبس
ياااااااااااارب بقى نتجوز فى الدنيا والجنه
وبعدين ايه ده انت بتعمل دماغ بدوا الكحه ؟؟ :)
نورتنى يادوك
----------------------------------
مصطفى محمد
هههههههههههههههههههههههههه
اه ليلى مراد دى حبيبتى ازاى انساها بسس :)
نورتنى يامصطفى
----------------------------------
اينوووو
ههههههههههههههههههههههههه كده انا نوسه شوو ؟
الله يسلمك يارب من كل شر
متقلقيش انا فله اهو :)
نورتينى ياقمراايه
Post a Comment