الجحيم هو نظرات الاخرين (سارتر) ..والراجل يشكر بصراحه وانا متفقه معاه جدا وبحرقه يعنى .... مش اى حد يحس بالجمله دى على فكره ..لكن بالنسبه لشخص انطوائى زى حالاتى فالجمله دى بتلخص فكرة التعامل مع الاخر
وانا طول عمرى اكره حاجه اسمها لفت الانظار
لان زى ماقال عمو سارتر ان نظرات الاخرين تمثلى الجحيم بعينه
يعنى ابشع حاجه فى نظرى واللى قلبى بيدق لما اتخيلها ,, انى ادخل المدرج متاخره ويكون اتملى والدكتور واقف وفجاه الاقى كل اللى قاعدين راسهم اتحولت ناحيتى ..... ساعتها بقى اتلخبط ورجلى تلف حوالين بعضها والاقينى روحت قاعده فى اى حته المهم يبطلوا بص وخلاص وافضل انهج وحاجه مرار يعنى
ليه بقى المقدمه الطويله العريضه دىىىى
عشان حصلى موقف وحش وحش وحش وحششششششششششششششش
كل ماافتكره اغمض عنيا واتكسف من نفسى
كان عندى سكشن باطنه
واذ فجأه تجيلى نوبة كحه
وكح كح كح كح كح كح كح
انى ابطل كحه
ابدااااااا
وعنيا دمعت
وبربرت (يع)ونفسى رااح
ان الكحه تسكت
ابدااااا
الدكتور خد باله وقالى ايه حد جايب سيرتك
بيهزر حضرته
انا فى ايه ولافى ايه
وزمايلى (كل الدفعه يعنى) سكتوا
والصمت خيم على المكان
وانا اكححح
واللى زاد الطينه بله
الدكتور يقولى اجيبلك ميه؟
وانا اشاور بايدى يعنى لا واكحححححح
مجرد اشاور بس لانى نفسى رايح مش عارفه اتكلم اصلا
المهم خرج جابلى ميه
يالهووووى يااانى كمااان
انا اكح واعمل الدوشه والازعاج ده واقطع الشرح وكمان يجيبلى ميه
دكتور ذوق ذوق ذوق الصراحه
عامة كل دكاتره طب كده متعودين منهم على الذوق
لكن معظم دكاترة طب اسنان بيعاملونا معاملة العبيد
طبعا اتكسفت اكتررر واكترررررر
وكنت عاوزه ابطل كحه باى طريقه
حاسه ان الناس صدعت منى
يعنى اكتم نفسى واموت واخلص من الكحه دى
المهم شربت الميه
والكحه راحت الحمدلله
وقعدت بقى عايزه الارض تتشق وتبلعنى والله
المهم انه الحمدلله عدى على خير ويارب مايعيده ابداا
المشكله اننا كنا وقتها فى مستشفى جامعة المنصوره
فى مدرج صغنون جوه عنبر مرضى -ازاى مدرج جوه عنبر للمرضى مش عارفه ومكنتش متخيله لحد ماشوفت الحقيقه المره - والدكتور خرج جابلى كوباية ميه زى ماانتوا عارفين ,,, وانا شربتها بردو زى ماانتوا عارفين :)
ياترى بقى كوباية الميه دى كانت نضيفه؟ ومصدرها ايه؟ :(
سؤال يطرررح نفسه :)
13 comments:
الف سلامه عليكي يانوسه
يالهووووي
انا حاسه بيك اوووي انا حصلي حاجه شبه كده وكنت في الكلاس بتاع الكورس
بس الحمد لله كان المستر مش موجود وكنت برضه مكسوفه اوي من زمايلي لاني كنت معرفش حد فيهم ولا ليه كلام مع حد بس الحمد لله شرقه وعديت علي خير :)
لا احنا الحمد لله عندنا ناس ذوق فى اسنان ذوق ذوق بس لحد الشفوى وكله زباله زباله
متقوليش اسنان ولا بشرى
انتوا سكاشن بشرى بدأت عندكم؟ احنا لسه
وبعدين حاجه اخيره بقى احنا عندنا البنات دحاحين مفيش حد منهم بيقعد على النت الوقت ده كله
وكل يوم تدوينه
الظاهر ان عندكم البنات مغشوشين
ههههههههههههه
السلام عليكم ورمة الله وبركاته
معلش بقى يادكتورة نوسة
تعيشي وتاخدي غيرها
وبم ان انتي دكتوره وبتفهمي في الاقتصاد وهتشتغلي محامية ان شاء الله
عنجدي سؤال اقتصادي ممكن تجاوبي عليه
سيسعدنا تشريفكم ورأيكم يهمنا
اومال لما ربنا يكرمك كدة يا نوسة وتبقى عروسة وواقفة بالفستان الابيض والناس كلها مورهاش حاجة غير انها تتفرج عليكى؟؟؟؟؟
:D
سلامتك ياقمر ومدونتك هادية ورايقة
تحياتى
سلامو عليكو
ههههههههه
ده لو سارتر نفسه كان قدامك ماكنش حيجيبلك ميه .. دكتور بالفعل ذووووق
و على فكرة بالنسبة للمية ..مية الحنفية المصرية الأصيلة .. أنا متأكد ان لو حد حط نقطة على الارض و حط بعيد عنها شوية برسيم
حيلاقي المية بتجري على البرسيم
سلام
الف سلامة يا دوك ... ده كلام ؟؟ فى دكتور يكح برضه ؟؟؟ :))
معلش تعيشى وتاخدى غيرها يا دوك وبعدين عادى موضوع المية اللى فى المستشفى هى كبسولة انتينال وكله هيبقى تمام :)
سلامتك يا ننوسه من الكحكحه يا قلبى
تلاقى بس العريس السكر بتاعك بيفكر فيك المهم المياه ان شاء الله تطلع ملوثه قصدى نظيفه وبعدين مياة المنوصرة نظيفه بقى وخليها فى سرك هههههههههههههه
يا نووووووووسه لازم تبطلى احراج شويه
مفيهاش حاجه لما تكحى او تخشى المحاضره متأخر
انتى كده النظرات جحيم بالنسبالك
ان مكنتش الدنيا كلها
هههههههههههه
و الف سلامه عليكى
تحيااااااااتى
ههههههههههههه
الف سلامه عليكي يا نوسه
بس بالفعل سؤال كوبايه الميه ده سؤال منطقي منطقي صراحه
هههههههههههههه
بس كويس ان الدكتور الذوق ده كان موجود محدش عارف لو ماكانش موجود كان حصل ايه
:) :)
يلا ألف سلامه عليكي مره تانيه يا نوسه وألف تحه ليكي
يالهوى يانوسة انتم بتاخدوا المحاضرات في عنابر
ربنا يستر عليكي يابنتي
ابقي خدي ميتك معاكي يابنتي
اكيد في ناس بتجيب في سيرتك كتييير
سلامتك يا اختي
بان الله تكون نظيفة ولو اني انصحك بغسيل دم بقى مش معدة
هههههههههههههههههه
يعني هي جت على دي ايه يا اختشي في حياتنا مش ملوث ربنا يعافينا يارب
عليكي ببسم الله بعد كدة من غير كحة ولو بكحة في عقلك قولي
وربنا يسترها
انت مش عاوزة تزوريني ليه
همممممممممممممم
مش حضرتك بتقولي دكتور ذوق
يبقي أطمنني
اينوو
الله يسلمك ياحبيبتى من كل شر يارب
بيبقى موقف منيل انا عارفه يلا خد الشر وراح :)
نورتينى ياقمرايه
---------------------------------
بطووط
ماشى يعنى من حقى اقر عليكم بقى :)
اه سكاشن الباطنه بدأت بس معرفش الجراحه العامه بدات ولالا
وبعدين يعنى شكلك قريت عليا بقالى 5 ايام اهو مدخلتش نت :(
وبعدين ياعم انا دبلر بعيد سنه تالته يعنى بعيده تماما عن الناس الدحاحين دول :)
نورتنى يابطوط
-------------------------------
الجمعاوى الاصيل
هههههههههههههه
اوكى انا جايه اهو :)
نورتنى ياجمعاوى
----------------------------------
انسانه
بس يحصل بس كده وانا مش هتكسف :))
هموت واتجوز اساسا :))
نورتينى ياقمرايه
----------------------------------
مصطفى محمد
ههههههههههههههههههههه
يعنى عندى حق اخاف من الميه اهو :)
نورتنى يامصطفى
----------------------------------
فوكس
هههههههههههههههههههه
على ضمانتك يعنى :)
نورتنى يافوكس
----------------------------------
آآبى
ههههههههههههههههههههههههه لو هيجيب سيرتى واكح طول عمرى خلاص موافقه
اه فعلا مية المنصوره نضيفه اووووى مخلياها فى سرى اهو :))
نورتينى ياآآبى
----------------------------------
شريف طلال
ماهو هعمل ايه الطبع يغلب التطبع :(
الله يسلمك يارب
نورتنى ياشريف
----------------------------------
مادوو
والله الدكتور يشكررر وحتى لو جاتلى اى عدوى هتبقى مش ذنبه خالص لانه عمل اللى عليه يعنى والحافظ ربنا
نورتنى يامادو :)
----------------------------------
المفقوعه مرارتها
جربت اخد شندوشتات وميه زى ايام ابتدائى كده بس المشكله انى بحس الهوا نفسه ملوث واول مااطلع الاكل من الشنطه احس انه خلاص اتلوث
انا مشكله اصلا :)
نورتينى ياجميل
----------------------------------
nonoymm
ههههههههههههههههههههههههه
قالولى كده بردو بس بصراحه مش ضامنه الميه اللى هيغسلولى بيها الدم :))
يانهار ابيض انا مش عاوزه ازورك ؟
ده انا اجيلك على عينى والله ياجميل
حالا جاايه اهو
نورتينى ياقمرايه
----------------------------------
قليل من التفكير
والله عندك حق
اكيد مش هيضرنى واكيد هو عارف الطب الوقائى والتعقيم والكلام ده
ربنا يسترها :)
نورتنى ياافندم
Post a Comment