انا مش عارفه ابعاد موضوع غزه ده
عشان من زمان مش متابعه اخبار ولاجرايد ولابشوف التلفزيون اساسا..نقول بقالى سنتين كده
بس من بعض المصادر على النت قريت انهم هدوا الجدار اللى بينهم وبين مصر ودخلوا
عشان ياخدوا اكل وحاجات كده يعنى
اوكى انا شايفه ان مفيش مشكله
واصلا المفروض احنا كنا نبعتلهم اكل من غير مايهدوا اى حاجه يعنى
بس كالعاده احنا مبنرضاش نزعل اسرائيل
النقطه اللى مش فاهماها بقى
بما انهم اقويا كده واتغلبوا على الامن فى غزه وعلى الامن المصرى كمان
و حركة حماس بتقول ان الثوره كانت شعبيه مش تنظيميه
ليه القوه دى متوجهتش ناحية اسرائيل
وبدل ما يضربوا قنابل فى الجدار اللى على حدودنا كانوا ضربوها فى اسرائيل
وبردو انا فاكره ان حماس وبعض الفصائل الفلسطينيه التانيه كانوا بيتخانقوا وبيضربوا قنابل وصواريخ على بعض
طيب يعنى عندهم اسلحه
واللى يقولك انه فتحاوى واللى يقولك انه حمساوى
فى ناس تحارب اهو وفى اسلحه
طب ليه مش بيطلعوا الغضب والثوره دى على اسرائيل؟
هيا حماس دى تبع مين؟
يعنى بتعمل ايه فى غزه؟
فين الحكومه بتاعت فلسطين؟
اه بجد فييين؟
يعنى بتعمل ايه ؟
محمود عباس ده بيعمل ايه؟
اسرائيل محاصره غزه
مانعه كل حاجه
يعنى اباده
والحكومه ساكته كده مستنيه لما الناس تجوع وتموت من البرد والمرض
النقطه اللى مش فاهماها بردو -معلش انا غبيه- كاتبين فى احد المواقع
ان الفلسطنيين لما فتحوا المعبر كانوا بيلوحوا بعلامات النصر
هو احنا اللى حاصرناهم وانتصروا علينا يعنى لامؤاخذه ولاايه
حسسونى انهم هدوا اسرائيل مثلا
انا مش ضد حد
ولا مع حد
انا عاوزه افهم
احنا ليه كده
وبعد ماافهم او حد يفهمنى.. هشوف بقى ههلل واهتف لمين وضد مين
12 comments:
اولا احييكى على المدونة الجميلة دى
ثانيا موضوع فلسطين والله هو موضوع ملعبك ومقعد وبقيت مش بتابعه مش عدم اهتمام بس زى ما تقولى كدة احباط ويأس من الوصول لنتيجة عادلة ترضى جميع الأطراف
مشكلة فلسطين اصلها وضحها فيلم باب الشمس لو كنتى شوفتيه
المشكلة دلوقتى ان فى ناس مصلحتهم ان الوضع يفضل كدة ومش هنقدر نقول مين صح ومين غلط لكن نقول ربنا لا تؤاخذنا بما فعل السفهاء منا
تحياتى :)
السلام عليكم
بصي يا نوسه هي مشكله فلسطين موضوع كبير ممكن لغايه بكره نتكلم فيه بس أنا هارد عليكي في حكايه انهم هدوا الجدار دي ,أو انهم لوحوا بعلامات النصر لما فتحوه
بصي هي اسرائيل محصراهم من كل حته حاولوا يستجندوا بمصر علشان تفتح معبر رفح مصر رفضت ولا كأنها بتشارك الأسرائيلين في الحصار ما كانش قدامهم غير أنهم يهدوه بصراحه ماهو ما فيش غير كده
الأطفال عماله تموت والنساء والمرضي طيب كان فيهاايه لو مصر فتحت المعبر من الأول ما كانش ها يحصل حاجه مصر كانت قافله معبر رفح علشان ترضي اسرئيل ليس الا وده غلط يعني ولا شايفه ايه؟
بحيكي بجد علي الموضع ده لأنه فعلا في ناس بتسأل نفس الأسئله اللي انتي طرحتيها ...تحياتي ليكي وألف تقدير
السلام عليكم
والله يانوسه انا زيك مش عارفه مين مع مين ومين علي مين كل اللي اعرفه اني اسرائيل في فلسطين ودي حاجه احنا نفسنا اتولدنا لقينها
ولسه امبارح بس بالصدفه كان بابا بيتفرج علي الاخبار جت في ودني كلمتني اني مبارك سمح للفلسطنين انهم يدخلو رفح عشان يكلو حمدت ربنا والله ومش سمعت غير الكلمتين دول لاني لما بتابع الاخبار حالتي النفساويه بتكون وحشه اووووووي بعدها من الدم والتقطيع اللي بيعرضوه:(
لما تفهمي بقي هستناكي تفهميني بأسلوبك الحلو ده من غير مين بيقطع مين متفقين ؟؟؟
مرسي علي ردك في مدونتي بفرح بيكي والله
:)
السلام عليكم ورحمة الله وبركاته
نوسة انت بتتكلمى بجد
مش عرفة ابعاد قضيتك
قضية دينك انا بجد زعلانة
انتى عرفة
كانوا خيفين الفلسطنيين يستمروا فى مصر ومش يرجعوا فلسطين
عرفه لما سالوهم
ردوا قالوا ابدا
ارضنا نسبها لمين؟
شوفتى الطفل هناك اول ما يعرف يتكلم بيعلموه ازاى يهتف لارضه ودينه ضد العدو
وعايزة اقولك حاجة
مش انتى بس مش عرفة
كتير عرفوا لما بدؤا يقروا الماضى والانتصارات والحروب واللى كان بيحصل فيها من قتل وتشرد وانتهاك لكل ما يمتلكه الانسان
الكل عرف لما قرا
لما شاف مين مع الحق ومين ضده
انت مستغربة القوة المتوجهة غلط
تفتكرى مين سبب التوجه الغلط
عرفه اية
الفتنة بنهم
اللى حصلت زمان ايام الرسول
صلى الله عليه وسلم
يعنى لازم يكون شر علشان يستمر الخير
بعد مناصرته
واللى حصل من مصر كان يجرح اى مسلم
كان بكل المقاييس اتفاق ضد شعب مش ضد جماعة معينه
ومناصرة الناس لحماس
مش لحاجة غير انها عوزة ارضها تستمر ملكها فقط
اتمنى انى مش اكون طولت
بس حسيت انك بنتى وبتسالى عن اللى بيحصل وحبيت اقولك ياجميل انتم اللى هتكملوا مشوار الحق
على فكرة نسيت
مدونتك رقيقة وجمييييييلة حتى من اسمها
ودى اول زيارة
لو عوزانى مش هتكون الاخيرة
مااااااشىىىىىى
سلااااااااااام
طيب لما تفهمى ابقى قوليلى
Foxology
اولا ربنا يخليك وبجد انت نورتنى
ثانيا هو فعلا ده اللى خلانى مش اتابع الاخبار من زماان
الاحباط
انا فعلا مشفتش فيلم باب الشمس
بس كل الموضوع ان الناس بتتكلم كتير اوى عن موضوع غزه وانا مكنتش عارفه فقولت احاول افهم المره دى جايز الوضع ميكونش محبط زى كل مره
مره تانيه نورتنىى :)
---------------------------
مادوو
وعليكم السلام
يامرحبا يامرحبا
نورتنى يامادوو
بص انا عارفه ان مصر غلطانه انها مفتحتش المعبر قبل ماالفلسطنيين يهدوه
كلنا عارفين انها بتعمل حساب لاسرائيل
ومسمحتش ليهم يعدوا وياخدوا دوا واكل غير لما لقت شكلها هيبقى وحش اوى ادام الناس
المشكله عندى بس لما فلسطين معاها اسلحه ويقدروا يتغلبوا على حصار ليه مش بيتغلبوا على اسرائيل
مره تانيه نورتنىىى ياماادو
------------------------------
اينووو حبيبتى
وانا زيك والله
انا عاوزه اعرف بس يعنى حكومة فلسطين وظيفتها ايه ورئيسها بيعمل ايه دلوقتى
نورتينى ياجميييييييييل :) ومتتقلقيش هتلاقينى عندك فى المدونه مقيمه يعنى :)
----------------------------
aea
لا حضرتك فهمتنى غلط
انا عارفه قضية فلسطين طبعا
دى حاجات خدناها فى التاريخ
وكنت بطلع مظاهرات فى ثانوى
وكتبت كذا قصيده حماسيه واتطبعت واتوزعت ايامها
وايامها كانت الانتفاضه
اللى انا مش عارفاه
دور حماس ايه؟
يعنى هيا هناك بتعمل ايه
والرئيس بتاع فلسطين ده بردو شغلته ايه؟
انا معاكى انهم عندهم حق يهدوا المعبر عشان ينقذوا حياتهم وحياة ولادهم
بس هو اللى اقصده لو وجهوا القوه دى ناحية اسرائيل كانت هتبقى حاجه فى صالحهم حتى وكانت اسرائيل هتعملهم حساب زى مابتعمل لحزب الله فى لبنان
بس كده
المدونه نورررررت بيك ياافندم وميرسى على ردك على الموضوع وطبعا ياريت اتشرف بيكى على طول
-------------------------------
آآبى حبيبتىى
اممممممممم حاسه انك بتكزى على سنانك وانتى بتقوليها ياآآبى كده لييييييييه :(
يعنى انا ياجماعه مش بشوف تلفزيون وربنا غير بالصدفه لما بكون بزور اختى لكن غير كده مليش فى التلفزيون ولا الرادبو ولابقيت اسمع اخبار
اعمل ايه فى نفسى
مبقيتش استحمل
بس كده :(
انتى سألتى السؤال اللى انا لسة كنت بسألة لنفسى من ربع ساعة قبل ما أدخل هنا
مصر لية عملت كدة؟
لية مفتحتش المعبر من نفسها؟
لو عرفتى قوليلى
:)
نوسه
معلش جيت تاني أتمني اني ما كنش ضيف تقيل عليكي
بس كنت عاوز أجاوبك علي سؤال ترحطيه وهو لما الفلسيطن معاهم أسلحه ويقدروا يتعلبوا علي الأسرائيلين ليه ما بيتغلبوش عليها؟
هو صحيح الفلسطينين معاهم أسلحه بس ما نقدرش أبدا أن احنا نقارنها بالأسلحه الأسرائيليه اسرائيل بتستخدم معاهم كل الأسلحه اللي انتي ممكن تتخيليها ولا كأنها بتحارب جيش نظامي ، ده حتي اسرائيل استخدمت في الحصار الأخير طائرات حربيه ودبابات ، لألأ بيتهيألي ما فيش مقارنه خالص ممكن نعملها بين الأسلحه الفلسطينيه والأسرائيليه لكن هما الفلسطينين بيعملوا اللي يقدروا عليه سواء القذف بصواريخ القسام أو غيرها من العمليات الفدائيه
تحياتي ليكي يا نوسه وألف شكر علي ترحيبك بيا في مدونتك الرائعه
سلامو عليكو
موضوع غزة يفرض نفسه بقوة على تفكيري هذه الأيام
بس بأمانة .. أفكارك دي فعلا تحفة
لما هما عندهم أسلحة .. بيتنططوا على بعض بيها ليه؟
و لما كسروا الحدود .. ليه علامة النصر .. هو احنا اللي حاصرناهم؟
مع التذكير برضه .. ان انا مش ضد حد
لذا .. اسمحي لي ان اضم غبائي على غبائك في هذا النطاق
تحياتي
مروووه حبيبتى
وده محتاج سؤاال يارورو ؟؟
خايفه من اسرائيل طبعا
---------------------
مادوو
اولا متقولش كده تقيل ايه بس ياراجل
دى مدونتك يعنى تيجى وقت ماانت عايز وتكتب اللى انت عاوزه كمان
ثانيا انا معاك ان فى فرق فى الامكانيات
بس الوضع نفسه منرفزنى
حاسه ان فى حاجه مريبه وان الفلسطنيين ممكن ينتصروا على اسرائيل بس فى حاجه فى الشؤن الداخليه بتاعتهم غلط
فى حاجه منعاهم غير الاسلحه
خيانه مثلا
ممكن
----------------------------------
مصطفىىىى
فى حاجه مريبه بتحصل اصلا
ونظرية المؤامره بتززززن على ودانى
اسرائيل عايزه مصر تتكفل بغزه
يعنى ايه الكلام ده؟؟
يعنى تبعا لنظرية المؤامره
ان اسرائيل هيا اللى خلت الفلسطنيين يدخلوا غزه بالهوليله دى
وبعدين ممكن تخليهم عندنا على طول
يبنوا مخيمات لاجئين مثلا عندنا
انا مش ضد ان الفلسطنيين يجوا عندنا على فكره
ماهى لبنان عندها مخيمات لاجئين
وكلنا اخوات يعنى
المشكله بس لو نظرية المؤامره دى صح
اسرائيل بتعمل كده ليه؟؟
السلام عليكم
نوسة
انتى عمرك ما اتنرفزتى على اخوكى او اختك جااامد
وقولتى انا لو مع غريب مش هعمل كدة
اهة فلسطين عملت كدة
كانت مخنوقة وفكره ان اللى هيوقف جنبها اهلها
لكن اللى حصل العكس
اصبح فى شروخ جواهم ناحيتنا
طبعا كمان اولادهم ونسائهم اللى بتموت
كانوا اشد دافع لاقتحام اى حدود
دا مش يقلل من اللى بيعملوه اتجاه اسرائيل
لكن دا نوع تانى مش انتقام
دا عتااااب بصوت عالى
طبعا مش عرفة فهمتى ولا لاءة
ولا انا لسة مش فهمة
بس اقولك
كلامك جميل
ربنا يجزيكى خير
سلاااااام
نوسه
ممكن تكون نظريه المؤامره هنا صحيحه
يعنى الضغط الزياده فغى الحصار والضرب على غزه لحد ميبقاش قدامهم اى حل غر دخول مصر وبعد كده تمنع اسرائيل رجوعهم عشلن تخلص منهم وفى نفس الوقت يبقى لهم حجه فى سينا
لكن
حتى لو دى الحقيقه
الرحمه فوق العدل
والرحمه يتقول
نلاقى الملهوف ونطبطب عليه ده اقل واجب بدل مش قادرين نحميه
مش نسيبه الكلاب بتجرى وراه وهو منهك ومصاب وجعان ونقفل الباب فى وشه
يمكن اكون مبفهمش فى السياسه صح
لكن انا بشر للاسف
يا ريت كل اللى انتى اتكلمتى عنهم فى البوست يعرفوا انهم بيتعملوا مع بشر زيهم
لكن ده مش هيحصل
عارفه ليه؟
عشان احنا فى الدنيا مش فى الجنه
Post a Comment