رومانسيات نووسه تيرارارارااااا

عريسى جه

انا جايه اهوه فستانى طويييييل

احم

النهارده جاء خطيبى و زوج المستقبل -ان شاء الله يااارب -عشان يزورنا

او يزورنى طبعا بلافخر يعنى

ولسه ماشى من شويه

كان يوم جميييييل انتصرنا فيه على الشر ..-يووووه يخربيت افلام الكرتون اللى واكله دماغى دى- قصدى اكلنا فيه لحمه ومحشى

وجابلى بسبوسه -عارف انى بموت فيها- وادااانى عيديـــــــــــه وانتوا لااااااااااااااااااا

واتمشينا فى المطر وكان الجو رومانسيا طحنا بصراحه

والطين غرقنى وديل الاسدال بقى لونه غريب اوى بس حسيت انه اشيك مع ملمس الطين يعنى

وطبعا البنطلون بقى لحد ركبتى ميه

ولكن انبسطنا وهو ده المهم

والاهم ان انا بذلت قصااااارى جهدى وعملت انى رقيقه ولكن بعض الهفوات كده كانت بتطلع

مثلا قومت ضربت ابن اختى قلمين ظراف عشان ضربنى بمسدس الخرز

واتضح ان ابن اختى كان مظلوم وخطيبى هو اللى كان بيهزر معايا

وايه تانى يانوسه

ايه تانى

اه زعقت فى اخويا عشان دخل بالكوتشى على السجاده وانا غسلاها وتعبانه فيها يعنى ماهو مش اسلوب يعنى بصراحه

واتنرفزت على بنت اختى عشان شدت الطرحه بوظتها

اه وكمان وهو داخل خالص كنت بزعق لاختى عشان اخدت دبوس الطرحه بتاعى وبعلو صوتى انا عاوزه دبووووووسى ياستى

مخدش باله مخدش باله

بتهيالى كده بس

-ولكن بغض النظر عن كده كنت فى غاية الرقه والوداعه- يختى قمررررر

وانا بوصلوا للميكروباص وهو مروح بقى قالى خلى بالك على نفسك وكلى كويس يانوسه

ياااااانى على الرومانسيه والبراءه

بموت فيه والله

يارب نتجوز بقى

مش هموت على الجواز يعنى ولاحاجه ابداااااااااا ده عشان خايفه عليه طبعا قطعا اكيد من غير شك

عشان ميفضلش متبهدل فى المواصلات كده رايح جاى من محافظه لمحافظه يعنى

وبعدين مبشوفوش غير مره او مرتين فى الشهر وساعات بيمر كذا شهر من غير مااشوفه

لما بيجى مبلحقش اشبع من ملامحه

مبعرفش ابصله ياجدعان (جمع جدع او جدعه)ياللمهزله

يالهوى عليا هفضل مكسوفه ابصله كده كتييييييييييير

المهم المهم ماعلينا

اهم حاجه شوفته النهارده

وكان يوم جميل

وانا فرحانه اوى

الحمدلله