حماتى ملاك

بقالى تقريبا 3اسابيع

من يوم فرح اخويا -26-7-2008

مسمعتش خبر كويس

يوم الفرح نفسه كان فيه خناقه

هبقى احكى تفاصيلها بعدين

تانى يوم الساعه 8 الصبح حماتى اتصلت وادتنى كلمتين فى جنابى وانا متنحه

! قالتلى الفرح كان بيئه

! اختك بتقول انها حماة ابنى

اختى كانت بتهزر عادى وقبلها حماتى قالتلى لازم اسمع كلام بنتها عشان هي حماتى الصغيره وانا روحت ضاحكه وقولتها طبعا ياماما طبعا ياسمسم.. اشمعنى انا مقفشتش وقلبتها دراما انى اسمع كلام واحده اصغر منى؟ انا ضحكت وقتها وخدتها هزار عادى

! محدش فى عيلتكم طيب غيرك انتى

)يعنى عيلتى كلها اشرار ومش بعيد ماسكين مطاوى)

! انا ابنى تتمناه اى عيله

! ابنى يدخل اى بيت وينقى العروسه اللى عاوزها وياخدوه بشنطة هدومه

ابنى مهندس اد الدنيا(انا ببيع جرجير بقى ومش من مستواه) والمفروض باباكى يندهله باشمهندس

انتوا هتجيبوا ايه فى الجهاز؟

! انتى خدتى ابنى منى

مش بشوفه غير مره فى الشهر

! خلاص خدتوه ليكم

! بعتلك رساله ؟ طب ومبعتش لاهله ليه ولاخلاص بقى ليكى لوحدك

وانا فى الفرح بعتله قولتله عقبالنا عشان كان فى الشغل ومحضرش الفرح رد عليا وقالى بحبك اوى

! ابنى محسود .. بيجى من عندكم تعبان

! خافى عليه واعمليله برستيج مينفعش كده ده ولاد اختك بيقولوله محمد

بنت اختى عندها سنتين ونص مبتعرفش تتكلم لسه اوى بتقوله مأمد دى تعتبر اهانه؟

الباقى على حلقات بقى عشان مش هستحمل اقول كل حاجه فى بوست واحد

هو انا كنت قولت فى اى مناسبه ان حماتى طيبه؟

لو كنت قولتها فانا بسحبها