انا خايفه
مش عارفه انا مكبره الموضوع ولا ايه
بس بجد خايفه من عدم التأقلم
يعنى طالت او قصرت فترة الخطوبه ولكن ان شاء الله فى الاخر هتجوز
وهروح ان شاء الله بيت جديد
وشقتنا هتبقى فى نفس بيت اهله
هيا مش دى المشكله على فكره
لانى مش بتاعت مشاكل واصلا م النوع اللى بيكبر دماغه اوى
وعمرى ماهبقى السبب فى مشكله ان شاء الله
واهله بردو فى حالهم
امال المشكله فى ايه؟
انا انطوائيه
مع العلم انى ممكن اخد على اى حد بسهوله على فكره
بس اهله بالذات ببقى متوتره وانا بتكلم معاهم
المفروض ان خطيبى عارف الموضوع ده
بس لقيته بيطلب منى اعمل واجبات اجتماعيه كده معينه
انا مش رافضه بس انا مشكلتى بتكسف
بس بعملها عشان خاطره
يعنى بكلم مامته كل اسبوع تقريبا
بعد المكالمه بقى بحس انى عايزه اعيط
بحس انى كبه كده
الكلام كله بيروح
يعنى ازيك ياماما
عامله ايه ازى صحتك
وانتى ازيك ياحبيبتى عامله ايه وعامله ايه فى المذاكره
وبس
وافضل ادور على كلام ملاقيش
مع انى مع صحابى وقرايبى رغايه اصيله يعنى
وبعدين هيا مبتتصلش بيا ابدا ولما قولتله كده قالى انها بتتكسف بردو
وم النوع الانطوائى وانتى لازم توصلى العلاقات وكده
طب ماانا كمان متنيله وانطوائيه
ليه انا اللى عليا اوصل العلاقات وامد جسور وابنى كبارى يعنى
المشكله اللى حصلت تافهه بس انا بجد مدايقه اوى منها
واحساس انى كبه مسيطر عليا جدا
اللى حصل بقى عشان مطولش عليكم يعنى
انى كلمت مامته وقولتلها هاجى ياماما يوم كذا عشان اشوفك
طبعا عشان اديلها هدية عيد الام
المهم قالتلى تشرفى وتنورى ياحبيبتى وكل الكلام الفارغ ده
كنت متفقه معاه على كلام تانى هقوله بس انا اتكسفت اقوله خالص والله
المفروض كنت هقولها كل سنه وانتى طيبه ياماما
عارفه انها جمله متكسفش
بس احنا اتفقنا ان انا كبه بقى
فاتكسفت ومقولتلهاش كده
لقيته مصمم انى اتصل تانى واقولها
قولتله مينفعش يعنى انا لسه متصله وكده هتصل تانى اقول ايه ؟
قالى خلاص ابعتى رساله
عرفت انه مصمم عشان مامته قالتله ان خطيبتك بتتكسف اوى
روحت باعته بس بعد ماغلبته بردو
المهم قالى كلمى بابا بقى
قولتله ماشى وكلمته
انا بعرف اتكلم مع باباه عن مامته كتييير اوى يعنى
فقعدت اتكلم معاه شويه وبعدين قالى والله انتى وحشانى
قولتله وانت كمان والله يابابا و هاجى اشوفك يوم كذا
لقيته اليوم ده هيكون مسافر
فقولتله خلاص يا بابا هاجى يوم تانى وبعدين خلصت المكالمه
محمد كلمنى وقالى ها عملتى ايه؟
قولتله حصل كذا كذا
لقيته بيقولى ليه يبنتى ماهو اليوم ده كان كويس
قولتله ماهو بابا مش هيبقى موجود يامحمد وبعدين عاوزه اشوفه
قالى كنتى اتصرفى وقوليله فضى نفسك يا بابا
انتى مبتعرفيش تتصرفى ليه ؟
على طول مفاتش يوم وحصل موقف بقى كان هو القشه التى قصمت ظهر البعير
كنت اخيرا لقيت بيشنت اعمله طقم وكده وكنت فرحت بقى
وفجأه البيشنت خلع وسابنى
فابصراحه مستحملتش بقى ده رابع واحد يجى ومن غير ماامد ايدى فى بوقه ويخلع
روحت قعدت اعيط
وساعتها محمد كلمنى حاولت مبينش العياط بس معرفتش
المهم قالى فى ايه حصل ايه بس؟
اول ماقالى كده انفجرت فى العياط زياده بقى وقولتله حصل كذا كذا
بدل مايهدينى اتنرفز عليا وقالى متعيطيش
مبحبكيش تعيطى وتبقى ضعيفه كده
مش عارفه بقى لقيتنى اتنرفزت
وقولتله بص انا بتكسف ومبعرفش اتكلم ومبعرفش اتصرف وبعيط
خلاص غيرنى وهات واحده سوبر بقى بتعمل كل حاجه بيرفكت
بس ده اللى حصل :(
عااااااااااااااااااااااااااااااااااااااااااااااااا :((
15 comments:
اول زيارة ليا الاقي خناقة وعياط نرفزة
بصي يا نوسة انا مقدرة كسوفك لاني زيك بالظبط بالذات مع الناس الكبيرة الكلام بحسه انه بيطير من دماغي مش عارفة ازاي وتيجي عند اصحابي او قرايبي تلاقيني مش بفصل كلام وممكن اتكلم 100 كلمة في الدقيقة من غير ما اخد نفس
بس لساني بقى يجي يعرج لما اتكلم مع حد كبير او حد بحس انه ملاحظ تصرفاتي
اما خطيبك فهو عايز الصلة تقوى بينك وبين والدته ومش عايزك تتكسفي منها وتتكلمي معاها كأنها والدتك
وكمان مش عايز حد يقوله خطيبتك بتتكسف والكلام دة
فبيحاول انه يخليكي مش كسوفة بزيادة
فانتي حاولي انك تستحملي شوية
ومن ناحية موقف البيشنت فهو مش عايزك انسانة ضعيفة
عايزك تحاولي وتجمدي ومش اي موقف تعيطي
وكمان متنسيش ان دموع المراة هي نقطة ضعف الرجل
تلاقيه اضايق لما عيطتي فقلبت معاه واتنرفز
ولالالالالا تزعلي نفسك يا قمر
معلش لو طولت عليكي
تقبلي مروري وتحياتي
سارة
معلش ماتزعليش نفسك كده بس انتي فعلا لازم شويه تاخدي عليهم لانك هتعيشي معاهم ولازم تعرفيهم اكتر بس براحه بالتدريج ده هيحصل ومش تتكسفي قوي كده وحاولي تفتحي مع حماتك مواضيع كتير تقربكم لبعض اكتر وربنا يوفقك يارب ويتمملك بخير يارب
اول ما هتتجوزى وتروحى تعيشى هناك هنلاقيهم كلهم عاملين مدونات يستغيثوا ويطالبوا ويتوسلوا لاى حد انه يسكتك
مقلقيش خالص كل الناس كده
والبيشنت هرب هههههههههههه
واحد صاحبى خد سكند امبربشن بيتصل بالعيان بعد كده لقاه مااااااات
احمدى ربنا وحاولى تانى
ايه يا ننوسه بس معلش بطلى زن هههههههه
بصى عادى انك تتكسفى وارد يعنى وده بحكم انك يا حبيبتى مش واخدهعلى والدته وعلى الحياه بس مع مرور الوقت هتتأقلمى
وبعدين معلش هو مش بيحبك تعيطى بس مش عارف يوصلها لك طيب ده انتى بتقدرى تعيطى معاه انما اللى عندى بعيد عنك محرم عليا العياط اصلا ولو سمع صوتى بعيط بيقفل التليفون فى وشى ابن ال.............
يالا مش مهم
المهم انتى قويه ورغايه خليكى كده هى مسأله وقت بس
يا نوسة يا حبيبتى روقى كدة وهدى نفسك
مش عيب ان يكون فيكى نقط ضعف
العيب انك تستسلمى ليها وتتحول الى عوائق تمنعك من ممارسة حياتك بشكل طبيعى
حاولى تاخدى الامور ببساطة وماتفكريش كتير فى اللى بتعمليه
اعمليه وخلاص وسبيها على ربنا
وبعدين كلمى خطيبك بالراحة وفهميه انك بتحرجى من مجاملات اهله
وخليه مايضغطش عليكى
بس خليكى فاكرة
ان مجاملات اهله دى مهمة جدا وبتعليكى فى نظره
وربنا يوفقك ويسعدك فى حياتك ان شاء الله
السلام عليكم يا نوسة
يعنى يا نوسة انا موعودة كدا
نفسى الاقى حد يقولى انا مرتاح وبنعرف نتفاهم مع بعض
على العموم خير
تسمعى نصيحتى؟
فى البداية بنقى زى نهرين كل واحد ماشى بموجه وبعلوه او هدوءه ولما بنتقابل كل واحد بيحاول يتأقلم مع التانى ...
اولا المناسبات الاجتماعية ضرورة لانقاش فيها بس اسلوبها بقى اللى نملكه يعنى ممكن اعمله انا بحب كده وفرحة وممكن بحرج وضيق والاتنين احساسهم بيوصل للطرف الاخر
ليه انتى اللى لازم تتصلى وتسألى ؟؟ لاننا الاصغر ولاننا لازم نقدر لهم سنهم ومكانتهم مهما كانت الظروف ومهما حصل بينى وبين جوزى او خطيبى اهله له مكانتهم مايصحش ندخل الامور فى بعضها يعنى خلى قناة الاتصال بينك وبين اهله منفصلة عن قناته هو
ثانيا خطيبك خايف على علاقتك بامه واهله ودا طبيعى اللى بنشوفه ونسمعه كل يوم يسد النفس واللابواب فاعذريه
لكن لى رأى
لازم تكونى اوضح فى التعبير عن مشاعرك وتحاولى تخدى الامور ببساطة اكتر من كدا لان الحياة مش حتطبطب عليك خلاص
يعنى نسيتى فى المرة الاولى وانا بتصل انى اقولها كل سنة وانتى طيبة يبقى اتصل تانى واقولها شفتى والنبى بتصل عشان اقولك كل سنة وانتى طيبة اقوم اقثفل قبل ما اقولها وتقلبى الموضوع هزار وكانك بتكلمى مامتك
انتى خايفة منها وخايفة يمكن من اللى بتسمعيه بسبب الحموات لكن اقسملك انه ده مش لازم يكون صحيح واعرف كتير علاقتهم بازواجهم متوترة وعلاقتها بحماتها احسن مايكون
الحكاية ادب وحسن تربية ومهما الست كانت او حتعمل لها مكانتها واحترامها ويمكن كمان عشان هو بيدفعك طول الوقت نحيتها ده مخليك متوترة اكتر
اهدى وروقى دمك الامور محتاجة بس حبة ترتيب وخلاص
اتعلمى تعترفى بكسوفك وتنتقديه لما يحطك فى مشكلة بعدها واحدة واحدة الامور حتبقى احسن
ولو على المرضى اللى بيهربوا مااعتقدتش العيب فيك بس دى عقيدة راسخة ان الست ماتنفعش تكون بتفهم يعنى انا شخصيا مابحبش اروح لدكتورة رغم ان ده غلط بس بعترف انى لما جيت اعمل سنانى اخترت دكتور ولما اضطريت فى حالة انى لازم اروح لست ماروحتش خالص لا لها ولا لدكتور
مش عارفة بس الموضوع محتاجة صبر مش عياط حاولى تعيطى مع اصحابك واشكيلهم ماتعيطيش مع خطيبك واضح انه بيحبك قوية مع ان البكاء سمة بيولوجية فينا
معلش طولت عليك
إيه يا دكتره؟
دا انت دكتورة يعني ولازم يكون عندك لغة علشان نعرف نطوّق الزبون و ننفضه
بالراحة كده يا نوسة
أنا بجد عارف أد إيه الموضوع صعب و يضايق كمان
انك تحسي كده انك متكتفة و حد عايز منك انك تعملي حاجة و انت مش عارفة تعمليها
بس خدي بالك انت اللي مكتفة نفسك
أنا حاسس بجد بحوار .. أكلمها أقولها إيه ده؟
بس على فكرة أنا مش شايف ان الكسوف البناتي ده حاجة أيّا يعني
هو ممكن خطيبك يعرّف أهله انك بتتكسفي وكده علشان يحاولوا ما يضغطوش عليكي
بس مع كده برده لازم تحاولي انك تعملي شوية من الواجبات العائلية دي
لحسن الكسوف ممكن يتفهم بعد كده انه تكبّر ولا حاجة
و نظام.. هي خطيبتك مش قابلانه ولا إيه؟
يعني خليكي شوية و شوية
أصل انت هتعيشي مع أهل جوزك ان شاء الله في بيت واحد
و دي حاجة بجد عايزه أسلوب كلام حلو و ملاغية و كده
و على فكرة طريقة تهدية خطيبك ليكي ما تزعلش أنا لو في مكانه هعمل كده برده
ده أسلوب
هو بيحبك و مش عايز يشوفك ضعيفة
و بالنسبة للبيشنتس
يا ستي هما الخسرانين هو فيه حد يطول ايدين حريمي تظبّطله سنانه
أولا لو على الحياء
فالحياء خير كله
............
أما لو على حسن التصرف
فحضرتك اكتر واحده سببتي الموضوع ده عندك
انسي انك سيئة التصرف
وانتي هاتحسني التصرف
وبعدين انا شايف ان حضرتك ماعملتيش حاجه فيها سوء تصرف ولا حاجه
بالعكس
كلك ذوق
هاي يا قمر
اختك برضو مخطوبه بقالها سنه و انشاء الله هيكون في مشاركه وجدانيه
بالنسبه للاحراجو الكسوف ده انت مأفوراها حبتين
انا باكلم حماتي او هيا بتكلمني علطول و مفيش اي حاجه
بس انا هقولك نصيحه و اجري على الله
انت بتتكسفي
يبقى ليه متستغليش كسوفك ده في حاجه ايجابيه
علشان اوضحلك الامور اكتر
الرغي و الكلام الكتير و نظام البساط احمدي ده محدش ابدا ينصح بيه
و دي خلاصة تجربتي
غلطه وقعت فيها و يا ريت محدش يكررها
فإنت ممكن تعتبري كسوفك ده شيء إيجابي و تحاولي كمان تحتفظي بيه لأنه على الاقل هيمنعك من الدلقه و الكلام الي ملوش لازمه و هيخليكي تفضلي في اطار الرسميات بس يا ريت ميبقاش لدرجة انك تكوني لخمه يعني
حاولي تعالجي النقطه دي بس
تقبلي تحياتي
ربنا يتملك على خير
سلامو عليكو
ايه يا بنتي
انت عاملة زي أختي بالظبط
برضه مبتعرفش تتواصل بالشكل الاجتماعي اللائق .. و مقولكيش على العياط .. انت أدري
على كل .. ما تزعليش .. تلاقيه هو كمان كان عنده حاجة موتراه عشان كده اتنرفز عليكي .. ما تزعليش بقه
:)
نوسه ايه الخنقات والحاجات الغريبه دي :(
لما قولتي انك خايفه من اللي جاي ومن عدم التأقلم حسيت اني طبيعيه واني ده شئ طبيعي يعني الحمد لله
يعني مش انتي لوحدك اللي عندك الاحساس ده
تاني حاجه باه
نصيحه يانوسه مش تخلي اي خلاف بينك وبين خطيبك او فيما بعد لما تتجوزي
يبات يعني انتي وهو تعدي الليله شايلين من بعض اتعودي دايما انكم تصفو الخلافات لقدر الله قبل مااليوم يخلص ومش تبيتو حاجه عشان مش بيكون حلو
ربنا يسعدك ويبعد عنك وعنه اي حاجه وحشه ويكملكم بخير :)
ولا تزعلي نفسك انا بايشنت بقي مليان مشاكل في سناني وعاوزة نوسة تصلحهم لي ولو عاوزة تعملي طقمكمان اخلع سناني كلها وتعمليلي الطقم
الموضوع بسيط يانوسة ماتكبريهوش
انا حاسة بيكي
انتي حاسة انك عمالة تحاولي ترضي خطيبك بس هو مش عاوز يرضي وبيدورلك علي الغلط
صارحيه يانوسة بسبب زعلك وفهميه ان الأسلوب ده بيتعبك وبيضايقك
وصدقيني الصراحة في الخطوبة بتبقي مقبولة اكتر من الصراحة بعد الجواز
بالراحة فهميه وهو ان شاء الله هايقدر حيرتك معاه هو ومامته وباباه
وربنا يعينك
لا حول ولا قوة الا بالله
معلش يا نوسة سحابة صيف وتعدى ان شاء الله
المشكلة بسيطة اوى بس توقيتها مكنش حلو اكيد كان فى حاجة مضايقاه وانتى كنتى طبيعى متضايقة معلش ربنا يهدى الحال وان شاء الله خير
تحياتى :)
بسم الله ما شاء الله
ايه ده كله
ايه يابنتى ده دا انتى محسسانى انك لسه فى حضانة
مش دكتورة قد الدنيا
ولتتعاملى مع مرضى
وناس
كبرى دماغك وعيشى الحياة بتلقائية كده
اول زيارة بس مبسوط بيكى بجد
ياخراااااااااااااااااشى
ايه يابنتى ده , ده انتى بسكوته خالص.
عارفه لو ماكنتيش مخطوبه ,كانوا كل العيال المدونين جم خطبوكى لانك بجد فرصه ماتتعوضش , اخيرا لقوا بنت بتتكسف.
اوعى تزعلى اللى انتى فيه ده ميزة مش عيب.
ربنا يسعدكم ويقرب اليوم الموعود.
Post a Comment