ربما اكثر مايغضبنى هو انتظار ما لايأتى ....شىء استفزازى .. محبط .. ربما يدفعنى الى البكاء قهرا
ولكنى الان ناضجه بما يكفى ..23 سنه
ربما علىَ ان اكون اكثر تعقلا .. اكثر هدوءا
ربما عليَ أن اتجنب إنتظار رد فعل معين لايجىء ابدا
فليس المخطىء من لا يقوم برد الفعل المنتظر
بل المخطىء هو انا لانى انتظر رد فعل معين طبقا لشخصيتى وطبيعتى
والطرف الاخر لا ذنب له فى اختلافه عنى
ربما علىَ ايضا الا أربط بين عصبيتى او حزنى بالطعام
فما ذنب معدتى الحبيبه أن اجعلها تعانى من تقلصات الجوع ؟
وأعتقد أن حصولى على سندوتش لن يقلل من شفافية حزنى
بل ربما يجعلنى اكثر قدره على الحزن .. فالحزن بمعده ممتلئه يصبح اكثر نضجا ..حزن بضمير
ربما فى الايام المقبله - ان شاء الله - اقلل من اندفاعى .. رومانسيتى ..ربما
احسبنى انظر للحياه بنظره مختلفه تماما الان
لست سعيده او حزينه .. لست غاضبه .. لست كارهه
فقط انا لا مباليه
اللعنه على كل شىء
وكما يقول التعبير الاكثر شعبيه وشمولا ومصداقيه .. اياكش تولع
13 comments:
ايه ده ؟؟ كل ده ؟؟
عموما فعلا مش غلطة اللى قدامنا لو كان رد فعله غير ما احنا متوقعين دى انا اتفق معاكى فيها تماما بس الحياة مش كدة اوى يعنى برضه مهما حصل اكيد فى نور ف اخر الطريق
تحياتى وامنياتى بحياة هادئة :)
نوسة
الافضل ان لا تأقلمى حياتك على انتظار شىء
فقط اعملى الى ربنا يقدرك علية بس
ولا تجعلى نفس فى موقف رد فعل تجاة شىء ما يحزنكى انكى تفكرين بالنيبة عن اشخاص
بس بصراحة انتى جدعة انك عرفتى تقنعى نفسك ان الاكل مسش لية ذنب
ربنا يخفف عنك يابنتى
نوسه
ايه يا نوسه هو الأكتئاب رجع تاني ولا ايه
بس أقلك سعات شئ من اللامبالاه لايضر أبدا بل في بعض الأحيان تكون مطلوبه بس أهم حاجه ما تزيدش عن حدها
أما بقي بخصوص الأكل فصحيح اللي انتي قلتيه فكونك تمنعي الأكل لن يفيدك في حل الموقف التي تواجهينه
كلي يا نوسه ...كلي واياكش تولع ولا يهمك
تحياتي لكي يا نوسه وألف تقدير لشخصك الكريم
ههههههههههه
اية يا بنتي دة
بجد كلامك جامد جدا جدا
ازاي كتبتيها
بجد معاكي حق والله عجبتني اعتقادك ان حصولك علي سندويتش يجعل حزنك اكثر شفافية
شكلك طالعة من مشكلة كبيرة تعبتي فيها جامد
ربنا معاكي
وصحيح اياكش تولع
مدونتك غاية في الجمال والرقة
استمتعت بوقتي خلال زيارتي الاولي لها
وحشتينى يانوسة انا عارفة انى غبت حبة بس غصبن عنى
سامحينىىىىى
وحشااااااااانى موووووووووووت
"بل المخطىء هو انا لانى انتظر رد فعل معين طبقا لشخصيتى وطبيعتى"
يااه يا نوسة
الاختلاف ده سعات بيجنني و يحبطني و يحرضني على الانتحار
و المشكلة ان الاكل هو منفذ عند البعض
و المشكلة الأضخم ان فيه ناس منفذهم أسوأ من كده.. زي سجاير مثلا
اللامبالاة نعمة
ربنا يدمها علينا وقت اللزوم
تحياتي
او متولعش
او اوا او اى حاجه
بس خدى الامور ببساطه يا نوسه شويه
باكشي تولع بجاز وسخ
محدش واخد منها حاجة
أيواان
أهم حاجة الحزن على معدة مليانة
ذنبه اية السندوتش؟؟
ومن هذا المزنق أحب أقولك أن أختك اللى هى انا
من الفصيلة اللى لما تزعل نفسها تتفتح عالبحــــــــــري
تاخدى حتة شنكاوتش؟
اظن يا نوسه انتى محتاجه تضحكى للدنيا شويه عشان تضحكلك
ده مش كلام أغانى
يعنى شويه لا مباله صغيريين مع شويه تفائل هينفعوكى
و يكش تولع
Foxology
طبعا اكيد فى نور فى اخر الطريق
بس لسه مشفتوش
نورررتنى وميرسى لردك
-----------------------------------
soso
ماهو فعلا قررت اعمل كده
ربنا يخفف عننا كلنا
نورررتينى وميرسى لردك
---------------------------
mado80
لالالا ربنا مايجيب اكتئاب
اظن ان التعايش مع الواقع وتقبله شىء كويس بغض النظر بقى عن ان الواقع حلو ولاوحش
وطبعا قطعا بكل تاكيد هاااكل
هو انا ناقصه نحاافه
نورررتنى يامادووو وميرسى لردك
-------------------------------
دكتور عبد الرحمن
الله يخليك يادكتور ونوررت المدونه
ميرسى لردك
--------------------------
مروه حبيبتى
ازيك عامله ايه
يارب تكونى كويسه
اصلا وسائل الاتصال بيكى شبه معدومه يارورو يعنى الايميل محكوم عليا مفتحوش والموبايل وقع منى وقعه ظريفه يدوب انقذت الشريحه وفى انتظار ايا من بابا او خطيبى يحن عليا ويجيبلى موبايل
ربنا معايا بقى مش همارس هوايتى فى الرن ابقى طمنينى عليكى على البلوج بقى لحد ماربنا يكرمنى يعنى
---------------------------------
مصطفى محمد
اه والله يامصطفى تخيل كده تبقى منتظر رد فعل ما ويجيلك رد فعل مختلف تمامااا
فعلا اللامبالاه نعمه فى بعض الاحيان
نورررتنى يامصطفى وميرسى لردك
---------------------------------
آآبى حبيبتى
ياستى كلها محصلها بعضها
وبعدين ماانا باخد الامور ببساطه.. بس ليه غيرى مابياخدهاش ببساطه زيى؟؟
ليه مطلوب منى انا اللى اخد الامور ببساطه دايما
ماعلينا
نورررتينى ياآآبى وميرسى لردك
----------------------------------
ابوشنب
اه محدش واخد منها حاجه فعلا
يومين وبنقضيهم وخلاص
نورررتنى ياابوشنب وميرسى لردك
-----------------------------------
شهرووزه
ماهو انا كمان كده وافضل اكل واكل واكل وميبانش عليا بس احيانا فى ظروف ما مبقدرش اقوم من مكانى حتى اعمل اكل
يلا بالف هنا وشفا ومن غير مايكون الاكل مصاحبه زعل ياارب وربنا يبعد عننا الزعل جميعااا
نورررتينى ياوزه وميرسى لردك
----------------------------------
شريف طلال
ماهو بحاول اعمل كده والله المستعان
حبة تفاؤل وحبة لامبالاه واهو الحياه تمشى
نوررتنى ياشريف وميرسى لردك
ازيك يا نوسه
والله كويس قوى ان الواحد يقدر الاختلاف مع الاخرين
مش لازم حد فينا صح والتانى غلط
احيانا بيبقى اختلاف فى الطباع نتيجه حاجات كتيره
رغم انك برضه زعلانه
لكن حلو قوى محاوله تقبل افعال الاخر من وجهه نظره هو
تحياتى
ربما .. حان الأوان لتدركي ان ما نريده شىء وما نحصل عليه في النهاية شىء آخر .. لذا ربما حان الأوان لتتوقفي عن التفكير في اي شىء عدا اللحظة الحالية التي هي كل ذخيرتك للغد
شكرا على مرورك الكريم على مدونتي .. أسعدني ذلك كثيراً .. ,وأسعدني أكثر أنك منصوراوية .. تحيا عروس النيل
Post a Comment