وانا قاعده مع نفسى كده فى لحظة صفا اكتشفت حاجه
انا فعلا اتغيرت
مكنتش كده خالص على فكره
فى أمثله كتيررره مرت فى خيالى
---------------------------------------
يعنى على سبيل المثال اتذكر انى من سنه مثلا كنت بتعامل مع سواقين التاكسى بطريقه وحاليا بتعامل بطريقه تانيه خااالص
زمان
----------------------------
سواق التاكسى : الاجره ناقصه ياانسه
انا: طيب حضرتك عاوز كام ياعمو ؟
سواق التاكسى: كذا
انا : اوكى اتفضل حضرتك
حاليا
-----------------------------
سواق التاكسى: الاجره ناقصه ياانسه
انا : ناقصه ازاى يعنى ؟
سواق التاكسى : لسه جنيه كمان ياانسه
انا : ليييه ؟؟ هو انا اول مره اركب تاكسى مثلا؟ انا بدفع كده رايح جاى
سواق التاكسى: انا جايبك من الجامعه ياانسه
انا : دى الاجره اللى بدفعها وساعات السواق بيدينى باقى كمان.. وانت مش جايبنى لوحدى انت بتركب معايا 4
كأنك ميكروباص بتركب بالنفر
سواق التاكسى :عنيه تحمر ويسكت
انا : هع ولابيهمنى
----------------------------------------------
كنت زمان خجوله اوى وانطوائيه
معرفش ابدأ حوار مع حد ولا اتعرف على حد
دلوقتى بقيت لهلوبه
لو واحده راكبه معايا فى التاكسى بكلمها و كانى اعرفها من 9 سنين
----------------------------------------
زمان لما كان يجيلنا ضيوف اجرى واقفل الاوضه على نفسى
او اقعد معاهم بس ساكته ومعتمده على اختى انها تتكلم او ماما
دلوقتى بما ان اختى اتجوزت وماما عيانه فبقيت انا اللى استقبل الضيوف وافتح حوار
واعمل احلى واجب وضحك وهزار عشان متبقاش القعده تقيله
----------------------------------------
زمان كنت بعيط من اقل حاجه وادام اى حد
دلوقتى لسه بعيط بردو بس ممكن امسك نفسى لحد ماابقى لوحدى
ممكن بس مش دايما
--------------------------------------
زمان كنت بكتب شعر وقصص وكان النحو لعبتى ومواضيع التعبير بتاعتى كان لازم الاستاذ او الابله يقروها للفصل كله
دلوقتى بقيت ضحله وغلطاتى النحويه والاملائيه اكوام اكوام اكوام
------------------------------------
زمان كنت هاديه اوى
دلوقتى بقيت عصبيه بطريقه وحشه
-------------------------------------
زمان مرضيتش اغش
دلوقتى غشيت
------------------------------------
فى حاجات اتغيرت للاحسن وفى حاجات اتغيرت للاسوأ
وفى حاجات متغيرتش خالص
-------------------------
لسه مبعرفش اعدى طريق العربيات لوحدى
لسه مبعرفش اشترى حاجه من السوبرماركت
لسه مبعرفش اعد الفلوس وبتلخبط فى الباقى
لسه مبعرفش اوقف ميكروباص ومصروفى ضايع على التاكسيات
لسه بقعد وانا تانيه رجلى وبخاف انزلها من على الكرسى او السرير احسن عفريت يشدنى
لسه بتخيل ان الراديو جواه ناس صغننيين زى عقلة الاصبع كده
------------------------------------
بس لان التغيير كان اكتر
فانا قررت انى اغير اسم البلوج
وبدل (مش هتغير) هخليه --->اى حاجه تانيه غير الاسم ده
9 comments:
هههههههههههههههههه
هعهعهعهعهعهعهع
نيااااااااااااهههااااا
ناس صغيريين جوة الراديوو
انا كنت بفتكر كدة زمان بس جوة التلفزيون
بت يا نوسة انتى عسل
انا بحبك اوى على فكرة
انتى متغيرتيش ولا حاجة
بس كل مرحلة زمنية وليها تفكريها
لو فضلتى زى ما انتى يبقى انتى انسانة مش طبيعيية على فكرة
انتى جواكى لسة النقاء والطهارة والضميير الحى
اوعى تتغيرى
يا ريت بس متزوديش العيار فى جلد الذات
بقى من النادر انى أقابل حد
عنده شفافية بالشكل الحقيقى ده
اه نسيت أقولك يا ريت متنسيش تطفى نور السلم
مرحلة يا نوسه فى حياتنا لازم نمر بيها انا برضه اتغير فيه حاجات للاحسن كتير بس فيه حاجات لسه مش قادرة اغيرها الواحد لما بيكبر عقله بيتفتح ويفهم اكتر لما يكون هو عنده القابليه انه يتعلم من أخطائه وأخطاء اللى حوليه ودى مهمه جدا علشان احنا مش دايما بنعرف او نعترف بأخطائنا
مبروك بجد على التغيرات
خصوصا خصوصا
موضوع الضيوف .. الواحد لحد دلوقتي مش بيلاقي حوارات يفتحها .. والنبي انصحيني
ومين فينا فضل زى ما هو رغم السنين انا لحد دلوقتى مش بعرف استقبل ضيوف او اعمل واجب ولحد دلوقتى انا وفى القاهره مش بركب ميكروباص بستسهل التاكسى ولحد دلوقتى بكون خجول ادخل مكان معرفش فيه حد
زمان ودلوقتى
كل حاجة بتتغير يعنى مثلاً زمان كانت اللحمة بنص ريال دلوقتى عايزة قرض من البنك يعنى من الاخر دلوقتى البركة قلت والجنيه لا موأخذة غلب الكرنيه
تحياتى
مروووه الحلوه اجمل غنوه
بطلى ضوحك يابت
وانا كمان بحبك- ياكزوووفى- احم
مااانا كفايه كده تغيير بقى
كده ميت فل واربعتاشر
---------------------------
maged stephen
الله يخليك ده بس من ذوقك
هو مش جلد للذات اوى بما انى قولت حاجات حلوه عملتها
----
لا مش هطفى النور بقى
انا بسيبه عشان لو قطه طلعت السلم بليل متتكعبلش او لو حرامى جاى بردو ميتكعبلش او لو عفريت ناوى يبات فى المدخل ميخافش
نيهاهاهاها
نورتنىىى
-----------------
آآبى
كلام جمييييل وكلام معقوووول مقدرش اقول حاجه عننة
لكن خيال حب
احم
اقصد متفقه معاكى جدا جدا ياقمررر
--------------------------
مصطفى
بص يامصطفى
الموضوع مكنش سهل ده احتاج منى تدريب
وربنا بتكلم بجد
بص الحوارات بتيجى حسب اللى قاعد ادامك
يعنى مثلا لو كانت خالتك او عمتك بتزوركم
ياترى ايه الشاغل الاساسى للستات؟
يااما الطبيخ يااما تربية الاولاد يااما اى كلام هايف عن المسلسلات
انت ابدأ وقول منوره ياخالتو او ياعمتو والله
هتقولك ده نورك يامصطفى هتسالها عن ولادها وجوزها واحوال الحياه معاها والكلام هتلاقيه جاب بعضه فى ثوانى
بالنسبه للرجاله اتكلم فى الكوره
لو ملكش فى الكوره يبقى المصارعه
يبقى السياسه
يبقى المظاهرات اللى بتحصل دى
وهكذا
اهمممممممم حاجه بقى
ركززززز معايا
اهم حاجه انك تبقى مستمع جيد
تقول مظبوط وتمام على اللى يقوله اللى ادامك وحتى لو اعترضت تعترض وتحسسه انه رايه صح بردو بس انت ليك راى زياده
فاهمنى؟؟
تحسسه انه مفيش منه يعنى وان الحوار معاه ممتع وتخلى الكوره فى ملعبه هتلاقيه هو اللى قاعد يتكلم ويفتح المواضيع
بسسس
اجنن انا طبعا مفيش منى يااخوتشششى
ابقى جرب الطريقه وقولى بقى يامصطفى
----------------------
رئيس جمهورية نفسى
اه ماهو انا فعلا كنت كده ومازلت على خفيف.. الخجل الاجتماعى ده مصيبه عشان كده
ناويه باذن الله اربى ولادى بحيث ميبقوش كده ابدا
ده لما اتجوز يعنى وربنا يسهلها بعد عمر طويل
طن الحديد بقى ب4050
والصينى سالت عليه بالفين
عااااااااااااااااااااا
احم
نورتنىىىىىىىىى
---------------------------
راسبوتين
ههههههههههههههههه
والله عندك حق
وعلى راى المثل
كل شىء يتغير الا قانون التغير
ايه المثل الغريب ده
انا بجيب الحاجات دى منين
نورتنىىىىىىىىىى
نوسه فكرتينى بنفسى
كل واحد فينا لو فكرفى نفسه من 10 سنين مثلا هيلاقى واحد تانى
والحمد لله التغيير معظمه للاحسن
وان كان على غلطه
الحمد لله انك حاسه فيها وندمانه
وكلنا بنغلط
احنا بنى ادميين على الارض مش ملايكه فى السما
تحياتى يا قمر
منى
وحشتينى وحشتينىىىى
كلامك صح طبعا
Post a Comment