انا غشـــيــــت
ايوووون انا غشيت
كان امبارح اول امتحان ليا وبدات السنه الجديد بماادة تقويم الاسنان
orthodontic
وغشيــت
اللجنه كانت سلطه
واول مره تحصل
يمكن لان اللجنه لايحه قديمه ودبلر فعاوزينا ننجح يعنى
حسيت انها اهانه ليا ان اللجنه سايبنها كده مفتوحه على البحرى
يعنى للدرجه دى مش واثقين فينا؟
للدرجه دى شايفين اننا فشله؟؟
للدرجه دى شايفين الامل الوحيد لينا اننا نغش ؟؟
وغشيت طبعا
ماهو اللى يلاقى دلع وميدلعش ..... ولاايه
المشكله انى مع نفسى حسيت انى اتغيرت كده ومبقاش عندى مبدأ زى زمان
انا فاكره ايام ثانويه عامه ..
كنت واخده الاحياء فى تالته ودخلت الامتحان من غير مااذاكر باب الى دى ان ايه
DNA
وفوجئت انه جاى حوالى 10 اسئله فى الباب ده
هعمل ايه بقى؟؟
هغش 10 اسئله؟؟
انا اغش؟؟
وكالعاده اللجنه كانت هيصه
وكل اللى فى اللجنه صحابى وكمان اللى ادامى على طول نوجه صحبتى الانتيم وادامها مى بردو صحبتى وجارتى
وعارفين انى محضرتش فى الدرس فى باب الدى ان ايه لانى كنت تعبانه لمدة شهر كامل فى البيت والاستاذ مكنش فاضى يشرحهولى لوحدى تانى وكمان انا كنت واخده السنه منازل يعنى محدش شرحهولى خالص وكنت داخله الامتحان مش مذاكراه ولافهماه اصلا ولاحتى قريته
ودول 10 اسئله يانوسه ... هعمل ايه دلوقتى ياربى؟؟
كده خلاص بانت ومفيش كلية طب
بس لقيتنى بقول لنفسى مهما هيحصل مش لازم اغش
كلية الطب هتضيع منى يعنى؟؟
وفيها ايه ؟؟
مش بدل مااحس انى قليله ادام نفسى
مش بدل مااعمل حاجه حرام
فى داهيه كلية الطب
خلصت الاسئله كلها ماعدا بتاع الدى ان ايه وقفلت الورقه وقعدت
وحطيت ايدى على خدى
المراقب جه قالى خلصتى ؟؟
قولتله ايوه
قالى مش عايزه اى حاجه؟؟
لا شكرا
يابنتى قولى... انتى تعبانه طيب؟؟
لا والله الحمدلله وخلصت
وكلهم كانوا ادامى بيغشوا وانا قاعده مبتسمه .. وكل شويه نوجه تقولى عاوزه حاجه يانوسه؟
اقولها لا انا خلصت.. مش عايزه انتى حاجه؟
تقولى لا انا خلصت
ويوم النتيجه كنت عارفاها طبعا
اكيد المجموع هيبقى زباله ومش هلحق حاجه
وفعلا بعد ما كنت فى تانيه جايبه 96 و6 فى الميه
لقيتنى فى تالته جايبه 94و4 فى الميه
وفى الاحياء 40 من 50
بس كنت فخوره بنفسى
المجموع ده مع انه مش كبير بس بمجهودى
وربنا مخيبش امل بابا فيا الحمدلله ودخلت طب اسنان ومن غير مااغششش
هو اه مش طب بشرى
بس بردو طب يعنى وهلبس البالطو الابيض وبيتقالى دكتوره من وانا لسه فى اول سنه
وكنت هطير من الفرح
وكنت مخليه الحكايه دى احكيها لولادى عشان اقولهم ان الغش مش حاجه كويسه ..عشان يتربوا صح
بس دلوقتى مش هعرف اقولهم كده لانى غشيت
غشيت عشان خوفت منجحش
ضعفت وغشيت
انا غششييييت ياسعااااااد
عااااااااااااااااااااااااااااااااااااااااااااا اهىء اهىء اهىء انا حزيينه حزييينه حزززينه
5 comments:
ننوسه
هو عمومنا من غشنا فليس منا
بس فى الحاله دى مصرح لكى الغش لا طبعا بهظر لانك فقدتى زى ما قولتى مبدأ من مبادئك وبعدين انتى مبتذكريش ليه اصلا هو خطيبك ده هيجى على دماغنا احنا ما علينا اهم حاجه لما تنجحى ان شاء الله تبقى دكتورة ناجحه واجى اعالج سنانى عندك من غير ما تتعلمى فيه وانتى شوفتى قبل كده لما مغشتيش ربنا وقف معاك ذاكرى يا بنت وانجحى خلينا نفتخر بيكى ولما يجوا اولادك ان شاء الله يتربوا صح وعلى مبادئ كويسه علشان نبقى ناس محترمة
ربنا معاكى يا رب
أولا أنتى بتجيبى سيرتى لية يابت فى سادس سطر
نيااااااهههاااا
ثانيا فى حد ميغشش فى ثانوية عامة ويغش فى الكلية .. طب كنتى أعكسيها
عالعموم الغش فى الأمتحان مينطبق ضمن قاعدة الغش لأنها كدة كدة كوسة ومحدش أصلا بيتخرج فاهم حاجة حتى لو كان بيذاكر وأول ما بيتخرج بينسى كلة وبيرمية فى الزبالة ولما بيتخرج مش بيشتغل فى تخصصة أصلا وبيعيش حالة غباء أقوى من إللى هو فيها
روحى ذاكرى بقى خليكى تخلصى بقى وتتجوزى
بذاكر والله يا آبى
والسؤال اللى غشيته كنت عارفاه
تخيلى كنت بتاكد بس لما لقيت عادى يعنى والمراقبه كل شويه تقولى حلى السؤال ده فى ورقه وهاتيه
فقولت اشمعنى انا
غلطت وانا عارفه
استغفر الله العظيم
نفسيتى تعبانه اوى بجد
وصحابى بيضحكوا عليا وبيقولوا وفيها ايه حد طايل وشايفين انى مكبره الموضوع
بس هو كبير فعلا
اه طب ماانا بجيب سيرتك كل يوووم وباكلها كمان
اعملك ايه ماانتى مختاره اسم فضيحه على كل لسان
بالنسبه للكوسه
هيا فعلا كوسه وعشان كده خلونا نغش ماهو كده كده مهما ذاكرنا وحلينا صح بنسقط
بس مكنتش عايزه ابقى من انصار الكوسه
كنت عاوزه ابقى مختلفه
ابعد عن ثقافة القطيع
طب كويس إن عندك تأنيب ضمير و وعي بان الغش مخالفة للضمير.. فيه ناس معندهمش الجانب ده
ربنا يوفقك
:)
Post a Comment