حتى الاكتئاب مش متهنيه بيه
لسه جايه امارس هوايتى فى التحديق فى سقف حجرتى العزيزه
ولسه يدوب مبقاليش يومين سرحانه
الا والاقى المشاكل تهل عليا والاقى بابا بيقولى هتعملى ايه فى موضوع الطقم
وموضوع الطقم لمن لا يعلم
ان كليتى العزيزه بتطلب من كل طالب انه يجيب واحد يعمله طقم اسنان
يعنى واحد معندوش سنان خالص وانا اعمله طقم
وبما انى دبلر اى بعيد السنه وشايله مادة الطقم دى فلازم وحتما ولابد الاقى عيان تانى اعمله طقم
والمفروض كنت اجيبه من اول السنه بس مش لاقيه اعمل ايه
والعيان بتاع السنه اللى فاتت كرهنى فى الحياه
اولا حسسنى انه بيمن عليا
كل شويه يقولى انا بعمل الخدمه دى بس عشان جوز خالتك الراجل السكره
يعنى انت مش عايز طقم ياعم الحاج؟
ولا مثلا بتيجى ببلاش ؟
ده غير انه مكنش بينتظم
يجى سكشن ويغيب سكشنين
ومكنش راضى يجى الامتحان كمان
طب امتحن على ايه ياعم؟
حرام عليك يعنى انا عملتلك طقم وانت عارف ومعرفاك من الاول انى هعملك طقم فى مقابل انى همتحن عليك
وتعب اعصابى وخلانى اعيط قبل الامتحان
المهم كرهنى فى حياتى وفى الكليه وفى دكاترة السنان وفى اللى خلانى ادخل الكليه وفى العيشه واللى عايشنها
وادينى شايله الماده كمان السنه دى
ومطلوب منى اجيب واحد كمان يكرهنى فى اى حاجه لسه مكرهتهاش
المشكله انى مش بطلب حاجه فوق طاقته
ده انا بدلعه اخر دلع وربنا
مبيدفعش مليم
الطقم فى اى عياده محترمه مبيقلش عن 800 جنيه
انا بعمله على حسابى اولا
ثانيا بديله على الساعتين 15 جنيه
وبخرج اوقفله تاكسى كمان وبدفع حقه
يعنى فى كده ؟
كل اللى طلباه انى بعد مااديله الطقم يخلينى امتحن عليه
والامتحان ساعه واحده
مفيهاش حاجه يعنى
أنا بصراحه سألت طوب الارض وموصيه اصحابى وقرايبى وجيرانى
يعنى وصلت انى اسأل سواقين التاكسى وربنا
وموبايلى مع اتنين سواقين وقالولى من عنينا والحاجات دى وبردو محدش عبرنى
والله انا مش طالبه حاجه كبيره
عيان عاوز طقم وهعمله على حسابى
هيجى يوم واحد فى الاسبوع لمدة ساعتين
هياخد على الساعتين 20 جنيه مش 15
اللى يعرف حد عاوز يعمل طقم يقولى
يعنى والله مافيها اى اهانه
ده بيزنس
انا عاوزه اعمل طقم لواحد وهستفيد انى همتحن عليه
والواحد ده عاوز طقم وهياخد مقابل مادى عشان لو هعطله عن شغل او حاجه
مفيهاش اى اهانه
بلييييييز اللى يعرف حد يقول انا فى مأزق بجد