قررررف

29-12-2008

عربيات الامن المركزى واقفه عند المحافظه وظباط عليهم القيمه تملاء الابتسامه وجههم واقفين فى انشكاح

السبب : على مسؤلية سواق التاكسى - استعدادا للمظاهرات عشان غزه

التعليق : هأو ... مظاهرات ايه ؟ اولا اللى بيعملوا المظاهرات هما طلبة الجامعه وحاليا فى امتحانات والعيال قاعده تذاكر مبتروحش الكليه

ثانيا بقى حتى لو فى مظاهرات حرس الجامعه بيقفل الابواب وعمرها مابتخرج بره حدود الجامعه

ثالثا بقى المظاهرات هتعمل ايه مع الحكومه دى

مش عارفه اعمل ايه

انا قرفانه

امتحانات وكده

كوباية سحلب (مشروبى المفضل ) او لبن (بقيت بشرب لبن وسبحان الله بقيت بحبه ).. متقوقعه تحت البطانيه وجنبى طبق يوستفندى وطبق فيشار كبيررر واحيانا بحط طبق طماطم (انا بموت فى الطماطم ) وكل المواد ورقها جنبى على السرير ومتقسم

اخر روقان صح

وياسلام بقى لو الكهربا تقطع .. بحب اذاكر فى ضوء الشموع

ولو الكهربا موجوده بعمل كوكتيل اغانى لنجاة وفريد الاطرش وابدأ المذاكره بقى فى جو يبان انه رايق بس هو متوتر وعاصف كمان من جوايا.. لا يقطعه سوى الصلاه او الزيارات المتكرره لبيت الراحه والزيارات دى مبتكترش غير ايام الامتحانات لحد مابظن انى عندى سكر بعد الشر وانا مش عارفه

بس اعتقد انه من التوتر او هروب نفسى من المذاكره بس هروب منيل بصراحه

طبعا كل ده بيبدأ من الساعه 5 المغرب كده لان قبل كده بيبقى فترة طبيخ وبخلص بليل على 1 كده

ده يومى المعتاد من اول شهر 12 تقريبا مع طبعا استثناءات لو رايحه الكليه اشوف ورق جديد نزل ولالا

وهكذا

احيانا ببقى نفسى اقعد تحت البطانيه كده من غير ماابقى ماسكه مذكره فى ايدى

احيانا بردو ببقى نفسى اعرف انام من غير ماافكر فى اى حاجه

من غير ماافكر فى اللى ذاكرته

من غير مااقعد - بيبقى غصب عنى - اسمع لنفسى اللى حفظته قبل ماانام

من غير مااخاف من الامتحانات

نفسى ابقى نايمه مرتاحه ومطمنه وبالى رايق

نفسى الاقى وضع مريح اصلا للنوم .. بفضل اتقلب وفى الاخر بنام نومه متعبه وبقوم عضمى كأنه دايس عليه قطر

مش فاكره انا كنت بنام ازاى الاول بس اكيد كان فى وضع مريح عارفاه ونسيته الايام دى

هفضل كده لحد 29 يناير ان شاء الله

حاجه متعبه جدا

عاوزه انسى

ان الواحد يروح لدكتور عشان يعالج عينه ويخرج من عنده مبيشوفش بيها خالص ده نسميه ايه ؟

هو ممكن نقول ان الظروف كلها كانت ضد المريض .. مستشفى حكومى زباله .. ايوه زباله لو فى حاجه اقذر من اللفظ ده يبقى حد يقولهولى .. الدكتور نفسه مش عارف اى حاجه عن اى حاجه واهو بيتدرب على مخاليق الله .. ده غير انه قرفان بعد كذا سنه فى الكليه يطلع يقبض مش عارفه كام جنيه كده

**************

ان الواحد - واحد تانى بقى - يروح يشيل المراره بسسسسس وبعدين بعد ما يخف ويخرج وبعدين يتعب ويكتشف انهم شالوا حاجه كمان مع المراره .. دى تبقى قلة ادب بصراحه

ممكن نقول ان الواحد ده كان برده على اده وعملها فى مستشفى حكومى زباااااله ايوووون وضيف على كده ان كان جراح معندوش ضمير

****************

انما بقى لما الوااااااحد -وده واحد تالت غير الاتنين الاولنيين- يروح لدكتور-دكتور سنان بقى - عامل يافطه تسعه متر وكاتب عليها الدكتور فلان النعسان ودكتوراه وماجستير وجامعة الواء الواء بجزر القمر وبيدرس فى الجامعه و عشان تدخل ويشوفك بس تدفع مبلغ وقدره ده غير انك بتستنى 3 ساعات متذنب فيهم لحد دورك ... وبعدييين بعد ده كله وبعد ماتروحله لمدة سنتين بنفسسسس الشكوى .. ويقولك كلمته المعتاده انا مش شايف فيه حاجه خالص تقلق .. ولما يفيض بيك وتقوله طب نعمل اشعه يادكتور-خد بالك انك انت اللى طلبت الاشعه مع انه المفروض هو اللى يعملها من غير ماتطلب عشان يتأكد انه كله تمام- يقوم يبصلك من فوق لتحت كده ويقولك بابتسامه لزجه ماشى نعملها بس صدقنى مفيش حاجه تقلق

ثم الفاجعه تظهر فى الاشعه والحل عمليه .. وبعدها يقولك بلهجة اتهام فظيييع اصل انت مبتغسلش سنانك كويس ودى غلطتك

طب لو الواحد ده مكنش طلب من الدكتور ان يعمله اشعه .. وكان فضل على ثقته العمياء فى الدكتور ان مفيش حاجه تقلق خاااالص

كان هيحصل ايه ؟

ده يبقى ايه بقى؟؟؟؟

هو المريض دلوقتى هو اللى بيطلب من الدكتور انه يعمله اشعه؟

اللى اعرفه ان الدكتور لو معرفش يشخص كده بمجرد النظر او فى حاجه مش قادر يعرفها وتاعبه المريض علطووووول يطلب اشعه

معادش فى دكاتره كويسين

معادش فى ضمير

معادش فى اى حاجه حلوه

انا زهقت من المآسى اللى بشوفها

بجد مفيش حد عنده ضمير خالص

نفسى الاقى حد عنده ضمير

نفسى الاقى حد لما ميعرفش ميفتيش

نفسى انسى شكل مستشفيات الجامعه

نفسى انسى شكل المرضى

الحمدلله الذى عفانا

my life

زى ما اينو لاحظت .. ان تقريبا يااما بتكلم عن كليتى الكريهه يااما بتكلم عن مشاكلى مع حماتشى

فعلا ده اللى بيحصل .. اصل هتكلم عن ايه تانى ؟ ماهى دى حياتى اللى بتتمحور فى 3 اتجاهات تقريبا .

الكليه - خطيبى وطبعا حماتى - اهلى وصحابى

مليش توجهات يساريه- معرفش يعنى ايه يسارى - ولا مشتركه فى حركة كفايه ولا عندى تحيز للاخوان ولا حتى ليا فى الكوره بس ده ميمنعش انى اهلاويه :D

وميمنعش بردو انى مبحبش الحكومه :D

بس انا مبحبش افتى فى حاجه معرفهاش لمجرد انى ابان ليا توجه سياسى او ابان مثقفه

وحاليا انا مش عاوزه ابقى عارفه فى السياسه ولا عايزه ابقى مثقفه .. بصراحه كل اللى عاوزاه فى الفتره دى من حياتى انى انجح واتخرج السنه دى واتجوز حبيبى ونبقى سعدا ان شاء الله

ممكن اكون ضيقة الافق وتافهه وانانيه وميهمنيش الا مصلحتى و و... لكن ده اللى انا عاوزاه فعلا بس حاليا .. هكدب يعنى؟

ده غير بقى ان عندى احباط اصلا ولامبالاه .. ومش ناقصه يجيلى ضغط وسكر وانا صغيره كده

حد يقدر يقولى ايه الفرق بين مصر دلوقتى ومصر من 6 سنين .. ايام ماكنت فى ثانوى يعنى وكان الحماس واخدنا اوى للسياسه والتغيير ؟

فلسطين لسه محتله صح ؟

المفاوضات شغاله والانتفاضه والمظاهرات والشجب والتنديد لسه شغالين؟

المواطن المصرى بقى له كرامه ؟

عندى قناعه تامه انى لو قريت اى جرنال دلوقتى هلاقى نفس اللى كنت بقراه من 6 سنين ايام ماكنت بشترى الجرايد واصدع نفسى

عندى قناعه انى لو فتحت التلفزيون وقعدت ادام نشرة الاخبار هسمع نفس الاخبار اللى كنت بسمعها من 6 سنين ايام ماكانت نفسى بتجيبنى اتفرج

عندى قناعه انى مفاتنيش كتير والاحداث هى هياها والفيلم ممل اوى ولسه بدرى اوى على كلمة النهايه

انا شايفه ان مفيش فايده

وعشان كده كفايه اوى مشاكلى عليا ولما تخلص واحس انى محتاجه مشاكل فى حياتى هقرر انى ابقى ثوريه

او ارشح نفسى للانتخابات او اعمل حزب ليه لا

حزب سيجنال تو من اجل اسنان افضل .. فكر جديد لمحاربة التسوس :D

عن دكاترة السنان

ان تكون طبيب اسنان

يعنى ايه؟

يعنى تبقى مطالب انك تكون فى الكليه الساعه 8 الصبح وتخرج منها 6 بليل

مطالب انك تقعد 4 ساعات ورا بعض فى المحاضرات ومتقفش حتى دقيقه بينهم لان كل دكتور بيسلم للى بعده وطبعا بيدخل مستعجل

وتقف 6 ساعات بردو متواصلين.. يااما ضهرك محنى على المريض يااما واقف مستنى مريض ومينفعش تقعد لان مفيش كراسى

مطالب انك تدور على مرضى

وتقسمهم فئات ... مرضى خلع , مرضى حشو .. مرضى طقم كامل , مرضى طقم جزئى , مرضى تركيبات ثابته :d

مطالب انك تحايلهم - المرضى يعنى - وتتصل تاكد عليهم المعاد

يعنى هتشحن كل يوم ياحلو :d

مطالب انك تتعامل بصبر وطووول بال مع نوعيات مختلفه من البشر

عينات من النوع اللى تخلصله حشو ضرسه مثلا ويخرج- وبالصدفه- يجيله خراج فى رجله. يجيلك ويقولك انت السبب لانك حشيتلى ضرسى غلط :d

مطالب انك تشترى كل حاجه من طقطق ل سلامو عليكم ..اموت واعرف تعليم مجانى يعنى ايه بقى ؟

مطالب انك تخلص الحاله وتجرى على المعيد تتحايل عليه عشان يجى يشوفها ويمضيلك الشيت ولازم تكون مخلص قبل معاد السكشن بربع ساعه والا المعيد هيمشى وياعالم هيرضى المره الجايه يمضيلك ولا لا :d

مطالب ان معظم اللى يقابلك ويعرف انك دكتور سنان تلاقيه يااما يفتحللك بوقه ويقولك ضرسى بيوجعنى اوى

يااما يبصلك من فوق لتحت ويضيق عنيه - لانه هيقول كلام حكيم طبعا -انتوا سبب العدوى الرئيسى فى مصر وخصوصا امراض الكبد

يااما يضحك برخامه ويقولك اه كلية الفرافير... وبجد نفسى اعرف ليه مسمينها كلية الفرافير ؟ :d

مطالب تشوف خراج مفتوح ولا قرحه فى اللثه طالع عنيها ومتتقرفش وتروح البيت تاكل وتتمنى انك متفتكرش المنظر بس على مييين .. بتفتكر بردو .. انا شايله ومعبيه اوى من الكليه دى وكل ماقلبى يحاول يصفى ليها يسود اكتررر

هالووووو ايفرى بدى:D

عميد كليتنا اتغير .. جابو عميد تانى .. العميد الجديد شعلة نشاط ( يقال انه كان فى بعثه فى احدى الدول الاجنبيه) وجه بقى غير النظام بتاع السكاشن بقى زى نظام بلاد الفرنجه

نظام اكتر .. علم اكتر .. دقه اكتر .. صرامه اكتر .. نضافه اكتر .. حاسه ان الكليه الكريهه بقت امممممممم نقدر نقول احلوت فى عنيا والنشاط اللى فيها اتنقل ليا بقدرة قادر كده سبحان الله اصل النشاط معدى على فكره .. يعنى لما اسمع الجيران بينفضوا المراتب مثلا الاقينى قومت من النوم صاروووخ انفض انا كمان

المهم يعنى انا مقتنعه جدا ان (اذا فسد الراعى .. فسدت الرعيه ) والعكس صحيح

والمعنى يفهم من سياق الكلام بقى عشان انا مبحبش السياسه :D

خليكى كوووول

عزيزتى حوا .. من واجبى تجاهك انى انصحك لو ليكى حما منغصه عليكى عيشتك .. مع العلم انك مبتعمليش ليها اى حاجه وحشه فاتبعى النصائح التاليه :-

اولا - كونى بارده .. ايوه باررررده بمعنى اكتر روشنه خليكى كوووووووول

يعنى لو كلمتيها فى التليفون وقفلت السكه فى وشك - مع انها هى اللى رنت عليكى - عادى مفيهاش اى مشكله .. كلميها تانى وافترضى ان الخط قطع

اما لو حماتك قفلت السكه تانى فى وشك مع انها بردو هى اللى رنت تانى وبعد ماعرفتيها بنفسك تقولك النمره غلط ... فأنا بردو بقولك عاااااااادى ياعزيزتى .. اعتبريها بتدلع عليكى شويه او بتهزر.. مفيهاش حاجه الناس لبعضيها

ولو حماتك هترتاح انها تقفل فى وشك السكه .. اتفقى معاها على انك تكلميها كل يوم مرتين وتقفل فى وشك عادى وليكن الجمعه والاربع اجازه مثلا .. عزيزتى 50 قرش مش هيفرقوا معاكى يعنى وابقى خلى خطيبك- او جوزك - يشحنلك

ثانيا - لو قالتلك حاجه وحشه -هزأتك يعنى - وبعدين انكرت اللى قالته وحورت فى كلامك عشان تخليكى انتى الغلطانه .. اتس اوكى عزيزتى .. فلتفترضى ان اعراض مرض الزهايمر بدأت عندها ولتتغاضى عن الامر

ثالثا -وركزى عشان النقطه دى مهمه- متحكيش اى حاجه لخطيبك او جوزك .. نيفررررررررر

لان فى عدة احتمالات وكلها ليست فى صالحك ابدااااا

الاحتمال الاول : هيقولك حقك عليا فاانتى هتحسى بالصعبنه بقى وهتقعدى تعيطى .. اول مره دموعك هتاثر فيه .. تانى مره بردو هتاثر فيه .. تالت مره هيسكت .. رابع مره هيقولك كفايه عياط .. خامس مره هيقولك احنا هنفضل فى النكد ده كتيررر دى بقت عيشه لاتطااااق

الاحتمال التانى : هيقولك يعنى اعملها ايه؟ دى مهما كان امى كبرى دماغك وخلاص .. الجمله دى هتخليكى بقى تشيطى .. ايوه هتلاقى دخان طالع من مناخيرك وودانك ومش بعيد لو صحتك على ادك يجيلك الضغط او السكر او جلطه مثلا خاصه لو حماتك كانت مزوداها شويتين يعنى معاكى

الاحتمال التالت : المواجهه .. هيجيبك ويقعدكم ادام بعض و تتوالى الاتهامات- من جانبها طبعا -.. لانك هتكونى بتقومى بدور المدافع فقط .. صدقينى مش هتعرفى تهاجمى .. دى حماتك ياماما .. والموقف ده هينتهى نهايتين .. النهايه الاولى هتعيطى وتبانى ضعيييفه اوى وتكرهى نفسك لانك مش هتعرفى تبررى موقفك وممكن تطلعك كذابه ادام خطيبك -او جوزك- وساعتها انتى مش هتستحملى ويااما تحطيله دبلته على صنية الشاى يااما تقوليله طلقنى عشان كرامتك هتوجعك اوى ساعتها وساعتها هتدمرى حياتك وتسعدى قلبها

والنهايه التانيه هتبردى وتخليكى كووووول وتكلميها بهدوء وتسبيها تبعبع باللى عايزاه وفى الاخر تقوليلها معلش ياماما حقك عليا يظهر انى سمعتك غلط اصل وقعت على ودنى وانا صغيره .. وبردو ساعتها هتحسى ان كرامتك بحححح خلاص اترمت فى الزباله مع انك احتفظتى بخطيبك او جوزك

وعشان كده اوووعى تحكى لجوزك او خطيبك على اى خناقه عملتها مامته معاكى

رابعا - متحمليش خطيبك - او جوزك - فوق طاقته .. متطلعيش غلك فيه هو ملوش ذنب ان دى مامته

بس خلاص

--------------------------------------------------------------

فى تاج من اينو رقة الاحساس -انا مش ناسياه يااينو وهجاوبه ان شاء الله- بس افوق بس

وتاج من منمن ساعات ساعات هجاوبه بردو ان شاء الله